Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 362 Hüküm no: 362 Orijinal metin no: [55a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ticaret için İstanbul’a gelen Rum, Ermeni ve Yahudiler’in avarız bedellerinin tahsiline dair ferman kaydı Akzâ kuzâti’l-Müslimîn evlâ vülâti’l-muvahhidîn ma‘denü’l-fazli ve’l-yakīn râfi‘ü a‘lâmi’ş-şerî‘ati ve’d-dîn vârisü ulûmi’l-enbiyâi ve’l-mürselîn el-muhtassu bi-mezîdi inâyeti’l-meliki’l-mu‘în mevlânâ İstanbul kādısı -zîdet fezâiluhû- tevkī‘-i refî‘-i hümâyûn vâsıl olucak ma‘lûm ola ki, Hazîne-i âmirem defteri mûcebince Tersâne-i âmirem ocaklarından olan İstanbul mahallâtından Anadolu ve Rumeli câniblerinde vâki‘ ba‘zı kazâ ve kurâda hâne-i avârıza bağlı olan re‘âyâdan ticâret tarîkıyle Âsitâne’ye gelip tavattun üzere olanlar evtân-ı kadîmelerine nakl ve iskân için mukaddemâ sâdır olan fermân-ı âlîşânım mûcebince İstanbul dâhilinde olan Rumiyân üzerlerine iki yüz kırk üç ve bir sülüs ve Ermeniyân üzerlerine iki yüz elli altı ve Yahûdiyân üzerlerine elli üç ve sülüs avârız hânesi ki cem‘an beş yüz elli iki buçuk sülüs avârız hânesi kayd olunmağla bin yüz elli üç senesine mahsûb olmak üzere avârızları mâlı cem‘ ü tahsîl olunmak lâzım gelmeğin (°) deruhde olunup yedine mühürlü ve nişânlı mevkūfât defteri sûreti verildiği mûcebince cem‘ ü tahsîl ettirmek fermânım olmuşdur buyurdum ki, hükm-i şerîfimle mübâşir-i mezbûr vardıkda bu bâbda sâdır olan emrim üzere amel edip dahi sene-i mezbûra mahsûb olmak üzere zikr olunan Rumiyân ve Ermeniyân ve Yahûdiyân’ın üzerlerine mukayyed olan ol mikdâr avârız defteri sûreti mûcebince Tersâne-i âmirem emîni -zîde mecdühû- tarafından cem‘ ü tahsîl ve teslîm-i Tersâne-i âmirem ettirip hilâf-ı emr ü defter kimesneye ta‘allül ve muhâlefet ettirmeyesin ve avârız için alınan akçenin her yüz on akçesinden bir esedî guruşu aldırıp ve hîn-i tahsîlde alınan akçeyi Hazîne-i âmirem aldığı vech üzere aldırıp ziyâde ve noksân alınmaya, kesr-i defterden ve ba‘zı hâneden ve fermânımdan ziyâde mutâlebesiyle zulm ü te‘addî ettirmeyesin, şöyle bilesin, alâmet-i şerîfe i‘timâd kılasın. Tahrîren fi’l-yevmi’s-sânî min-Muharremil-harâm li-sene selâse ve hamsîn ve mi’e ve elf. Kostantıniyye el-mahmiye