Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 362 Hüküm no: 363 Orijinal metin no: [55b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürekçiyan avarız hanesi bedellerinin tahsiline dair ferman kaydı Akzâ kuzâti’l-Müslimîn evlâ vülâti’l-muvahhidîn ma‘denü’l-fazli ve’l-yakīn râfi‘ü a‘lâmi’ş-şerî‘ati ve’d-dîn vârisü ulûmi’l-enbiyâi ve’l-mürselîn el-muhtassu bi-mezîdi inâyeti’l-meliki’l-mu‘în mevlânâ İstanbul kādısı -zîdet fezâiluhû- tevkī‘-i refî‘-i hümâyûn vâsıl olucak ma‘lûm ola ki Hazîne-i âmirem defterleri mûcebince mahrûse-i İstanbul kazâsının iki bin altı yüz doksan dokuz buçuk ve bir sülüs kürekciyân avârız hâneleri olup bin yüz elli üç sene[sine] mahsûb olmak üzere kürekçi bedeli avârızları mâlı cem‘ ü tahsîl olunmak lâzım gelmeğin (°) deruhde olunup yedine mühürlü ve nişânlı mevkūfât defteri sûreti verilmeğin mûcebince cem‘ ü tahsîl ve dâhil-i Tersâne-i âmirem ettirilmek fermânım olmuşdur buyurdum ki, hükm-i şerîfimle mübâşir-i merkūm vardıkda bu bâbda sâdır olan emrim üzere amel edip dahi sene-i mezbûra mahsûb olmak üzere mahrûse-i İstanbul kazâsının ol mikdâr avârız hânelerinin her bir avârız hânesinden dörder yüz yirmi dokuzar akçe kürekçi bedeli avârızların irsâl olunan mühürlü ve nişânlı mevkūfât defteri sûreti mûcebince cem‘ ü tahsîl ve dâhil-i Tersâne-i âmirem ettirdip dâhil-i emr ü defter kimesneye ta‘allül ve inâd ve muhâlefet ettirmeyesin ve bundan mâ‘adâ mübâşir-i merkūmun cihet-i ma‘âşı’çün her bir avârız hânesinden onar akçe vech-i ma‘âş ve on beşer akçe harc-ı Tersâne dahi aldırıp ve avârızları’çün alınan akçenin her yüz on akçesinden bir esedî guruş tahsîl ettirdip ve hîn-i tahsîlde alınan akçeyi Hazîne-i âmireme alındığı vech üzere aldırdıp bundan ziyâde ve noksân alınmaya, kesr-i defterden ve ba‘zı hâneden ve fermândan ziyâde mutâlebesiyle zulm ettirmeyesin, şöyle bilesin, alâmet-i şerîfime i‘timâd kılasın. Tahrîren fi’s-sâmin min-Muharremi’l-harâm sene 1153. Be-makām-ı Kostantıniyye