Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 363 Hüküm no: 364 Orijinal metin no: [55b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’a gelen Kıbtîlerin kanunsuz hareketlerinin engellenmesi ve kefillere bağlanmasına dair buyruldu Bâ-sah Kıbtiyân fermânıdır İstanbul kādısı fazîletlü efendi Vilâyet-i Rumeli ve Anadolu câniblerinde sâkin olan Kıbtî tâifesinden ba‘zıları kisb ü ticâret bahânesiyle Âsitâne-i sa‘âdete gelip kendi cinslerinden olup Tersâne-i âmirelü ve ocakhâ-yı sâirede âlât-ı âheni tasnî‘ ve inşâsı hizmetinde olanların içlerine duhûl ile Âsitâne-i aliyyede leylen ve nehâren envâ‘-ı mel‘anet ve habâsete ictirâ eyledikleri cihetden ol makūle taşradan gelen Kıbtîler ba‘de’l-yevm gelir ise kabûl olunmayıp yanlarından tard ü teb‘îd ve bu tarafda Tersâne-i âmire ve ocakhâ-yı sâirede âlât-ı âheni istisnâ‘ı hizmetinde i‘mâl olunup ma‘den kaleminde defteri ihrâc olanlar ile yerleri üç yüz doksan üç Kıbtiyân fîmâ-ba‘d kendi hâllerinde ırzlarıyla mukayyed olup ibâdullahın emvâl ve eşyâsını sirka misillü harekât-ı nâ-marzıyeye tasaddî etmemek ve iyâzen billâhi te‘âlâ harîk vukū‘unda tebdîl-i câme yağmacılık tarîkına sülûk eylememek üzere ber-vech-i ocaklık Kıbtiyân maktû‘una mutasarrıf olan bâzergânbaşı Hüseyin Ağa ve çeribaşıları ma‘rifetleriyle kefîlleri alınıp dahi hilâfı zuhûr eder ise kendülerin ve kefîllerinin bilâ-emân cezâları tertîb olunmak şartıyla elli neferi tenzîl ve taht-ı zâbıta ifrâğı münâsib olmağla imdi ma‘rifet-i şer‘le minvâl-i muharrer üzere tenzîl ile mezbûrların kefîlleri ahz ve kalemine kayd olunmak için i‘lâm eyleyesin deyü buyruldu. Fî 9 Muharrem sene 1153.