Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 330 Hüküm no: 476 Orijinal metin no: [71a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bâkikullarından Mahmud Bey’in Mehmed Çelebi’ye ödemesi gereken parayı vermesi gerektiği Dergâh-ı âlî yeniçerilerinden işbu bâ‘isü’l-kitâb Mehmed Çelebi b. Ahmed mahfil-i kazâya bâkīkullarından Mahmud Bey’i ihzâr ve üzerine da‘vâ edip sâbıkā arpaemîni olan Mustafa Efendi zimmetinde müşterâ ve makbûzu olup mikdârı beynimizde ma‘lûm arpa bahâsından yirmi beş bin akçem olmağla mezbûr Mahmud Bey’i üzerine mübâşir alıp meblağ-ı mezbûrun yirmi dört bin akçesini mezbûr Mahmud Bey bana getirip lâkin üç bin akçesi gāyet züyûf olmağla tebdîl için benden yine mezbûr Mahmud Bey ahz u kabz eylemiş idi, suâl olunup ol meblağı bana teslîmine tenbîh olunmak matlûbumdur dedikde gıbbe’s-suâl mezbûr Mahmud Bey cevâbında fi’l-vâki‘ meblağ-ı mezbûr üç bin akçeyi merkūm Mehmed Çelebi’den ahz u kabz eyledim, hâlâ bendedir deyü meblağ-ı mezbûr kendide olduğunu bi-tav‘ihi ikrâr u i‘tiraf etmeğin mûcebince zikrolunan üç bin akçeyi yine merkūm Mehmed Çelebi’ye teslîm etmek üzere mezbûr Mahmud Bey’e tenbîh olunup mâ-hüve’l-vâki‘ gıbbe’t-taleb ketb olundu. Fi’l-yevmi’s-sâdis ve’l-ışrîn min-Zilka‘deti’ş-şerîfe li-sene erba‘a ve sittin ve elf. Şuhûdü’l-hâl: İbrahim Beşe b. Mehmed, el-Hâc Abdülcelil b. ( ) arpacı, Hasan Beşe arpacı ve gayruhum mine’l-huzzâr.