Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 364 Hüküm no: 365 Orijinal metin no: [55b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rumeli ve Anadolu’dan İstanbul’a gelen Kıbtîlerden kanunsuz harekette bulunanların geri gönderilmesi, işinde gücünde olanların ise kefillere bağlanarak iskan edilmelerine dair ferman Bu fermânın defteri sicill-i âharına kayd olundu Kıbtîler fermânıdır Bâ-sah Vezîr-i mükerrem izzetlü rif‘atlü yeniçeri ağası paşa hazretleri Vilâyet-i Rumeli ve Anadolu’da sâkin Kıbtiyân ve ifrâz-ı Zülkadriye tâifelerinden ba‘zıları kisb ü kâr ve tahsîl-i nef‘ ü yesâr bahânesiyle Âsitâne-i aliyyeye gelir ba‘zı mahallâta duhûl ve karâr ve kendi hallerinde olmayıp dâimâ ibâdullahın emvâl ve eşyâsını gasb ve ihtilâsına ictisâr ve ma‘âzallâhu te‘âlâ harîk vukū‘unda tebdîl-i câme askerî tâifesi kıyâfetinde yağmagerlik tarîkına sülûk ile ızrârdan hâlî olmadıkları cihetden İstanbul ve sâir mahallerde sâkin Kıbtiyân tâifesinin içlerinde bu misillü fesâd ve şekāvete ictirâ edenler ihrâc ve tard ü teb‘îd ve kendi hallerinde kisb ü kârlarıyla meşgūl olanlar tefrîk u temyîz ile taht-ı zâbıtaya rabt olunmak istirâhat-ı ibâd ve emniyet-i bilâda bâ‘is olduğuna binâen bu def‘a ma‘rifet-i şer‘ ve zâbitleri ve çeribaşıları ma‘rifetleriyle Tersâne-i âmire ve ocakhâ-yı sâirede âlât-ı âheni tasnî‘ hizmetinde olup altmış altı nefer kalburcu ve elekci tâifesinden mâ‘adâ dört yüz on bir nefer Kıbtîler ba‘de’l-yevm kendi hallerinde olup ibâdullahın emvâl ve eşyâsına ta‘arruz eylemeyip ve gecelerde tebdîl-i câme yağmacılık tarîkına sülûk eylememek ve hâricden gelenleri içlerine almamak şartıyla çeribaşıları ma‘rifetleriyle birbirlerine kefîle verilip esâmîleri ale’l-infirâd defter ve İstanbul kādısı sicillâtına ba‘de’l-kayd bir sûreti ihrâc ve tarafınıza irsâl olunmağla imdi derûn-ı defterde kefîlleri ahz olunup Tersâne-i âmire ve ocakhâ-yı sâirede âlât-ı âheni istisnâ‘ı hizmetinde olan dört yüz on bir neferden mâ‘adâ gerek Kıbtî ve gerek ifrâz-ı Zülkadriye’den olanlar ile altmış altı nefer kalburcu ve elekci ba‘de’l-yevm dâhil-i sûr-ı Kostantıniyye’de bulunmamak üzere dört beş güne dek zâbitleri ve çeribaşıları ma‘rifetleriyle bulundukları mahallerden ihrâc ve oymakları içinde sâkin olmak şartıyla tard ü ib‘âd ve müddet-i mezkûre hitâmına dek hilâf-ı emr-i âlî harekete ictirâ ile meks ü tehîr edenler ahz ve küreğe vaz‘ olunacakların tenbîh ü ifhâm ve zâbitleri ma‘rifetleriyle dâimâ teftîş ve tefahhusdan hâlî olmayıp mugāyir-i fermân-ı âlî vaz‘ u hareket edenleri bi-eyyi vechi kân zuhûra getirilip kendüleriyle kefîllerinin cezâları [56a] tertîb ve icrâsı’çün huzûruma ihzâra sa‘y ve ihtimâm ile temîn-i bilâd ve tathîr eyleyesin deyü buyruldu. Fî 15 Muharrem sene 1153.