Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 366 Hüküm no: 367 Orijinal metin no: [56a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da kereste muhtekirlerine izin verilmeyip kerestenin Çöplük İskelesi’nden dağıtımının sağlanmasıyla ilgili ferman kaydı Bâ-sah Kereste fermânı İstanbul kādısı izzetlü fazîletlü efendi hazretleri ve gümrük emîni ağa, Dârü’l-hilâfeti’l-aliyye mahmiye-i Kostantıniyye’de kerestenin kılletine bâ‘is olmamak için gerek muhtekir tâifesi ve gerek keresteci esnafından mahzen sâhibleri ve sâirleri Bahr-i siyâh tarafından gelen kereste sefînelerin mahzenlerine ve Mısr-ı Kāhire’ye ve kefere sefînesine yanaşdırmayıp mezâd yeri olan Çöplük İskelesi’ne hamûleleri olan ecnâs-ı keresteyi ihrâc ve hâssa mimârbaşı ağa ve keresteciler kethüdâsı ve ustaları ma‘rifetleriyle mu‘âyene ve fiyatı vaz‘ ve ibâdullaha fürûht eylemek üzere mukaddemâ evâmir-i aliyye sâdır olmuş iken muhtekir keresteci tâifesi evâmir-i şerîfeye adem-i mürâ‘at ile ibâdullaha keresteyi getiren ashâbından aldırmayıp diledikleri mikdâr bahâ ile fürûht eylemek kasdıyla kendüleri iştirâ ve İstanbul ve Galata ve Üsküdar ve muzâfâtında olan ibâdullahın meşakkatlerine bâdî olanlardan mâ‘adâ İstanbul ebniyesinde müsta‘mel Mısır harcı olan keresteyi dahi getiren ashâbından aldırmayıp kendileri iştirâ ve birkaç kat bahâsına bey‘ ve fürûht eyledikleri tüccâr-ı Mısır kalyonları kapudanları tarafından inhâ ve bilâd-ı Mısriye’de olan ibâdullahın dahi def‘ ü ref‘-i muzâyakaları istid‘â olunup bu husûsun hüsn-i nizâmı lâzım hâlden olmağla imdi ol makūle muhtekir keresteci tâifesinin ber-vech-i muharrer ta‘arruzları men‘ ve İstanbul ve Galata ve Üsküdar ve muzâfâtı ahâlîsinin muzâyakaları olmayacak vech üzere hüsn-i nizâm ve İstanbul ebniyesinde müsta‘mel olmayıp Mısır harcı olan kerestenin dahi nakli husûsu mezîd taharrî ile bir dürlü tagayyür olmayacak vech üzere bir sûret-i müstahseneye ifrâğa ihtimâm ve iktizâ eden şurûtuyla verilen nizâm ale’l-iltizâm düstûrü’l-amel olmak üzere emr-i âlî ısdâri’çün huzûrumuza i‘lâm eyleye deyü buyruldu. [56b] Sâbıkā imâm-ı sultânî olan Mahmud Efendi merhûmun mahdûm-ı mükerremleri fazîletli semâhetli Abdullah Efendi hazretlerinin zamân-ı hükûmetlerinde vâki‘ olan i‘lâm kayıdlarıdır. Harrarahû el-fakīr Feyzullah el-mukayyid-i Mahkeme-i Bâb fî 6 Zilka‘de 1152.