Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 367 Hüküm no: 368 Orijinal metin no: [56b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hüseyin’in borcunun terekeden ödenmesi Arzuhâlde mezkûr müteveffâ el-Hâc Mehmed b. İbrahim b. Abdullah’ın sulbî kebîr oğlu ve hasren vârisi olan sâhib-i arzuhâl Hâfız Mustafa Mahkeme-i Bâb’da meclis-i şer‘de Hocazâde Efendi kethüdâsı el-Hâc Hüseyin b. Bayram b. Abdullah nâm müteveffânın verâseti zevcesi Emine Hatun ile kızı Hacer nâm sagīre ve li-ebeveyn karındaşı Mehmed’e münhasıra olduğu şer‘an müte‘ayyen oldukdan sonra mezbûr Mehmed kendiden asâleten ve sagīre-i merkūmenin tarafından dahi vekîl olduğu şer‘an sâbit olmağla vekâleten terâfü‘lerinde babam müteveffâ-yı mezbûr el-Hâc Mehmed’in müteveffâ-yı sânî el-Hâc Hüseyin zimmetinde işbu bir kıt‘a temessük mantûkunca cihet-i havâleden yüz guruşdan bâkī doksan guruş hakkı olup kable’l-edâ babam mezbûr el-Hâc Mehmed fevt olmağla meblağ-ı bâkī-yi mezbûr doksan guruşu müteveffâ-yı sânî el-Hâc Hüseyin tereke-i Hüseyin’in tereke-i vâfiyesinden taleb ederim deyü ba‘de’d-da‘vâ ve’l-inkâr müdde‘î-i merkūm Hâfız Mustafa ber-vech-i muharrer müdde‘âsını Halil b. Hüseyin ve Süleyman b. Abdullah nâm şâhidân-ı mu‘addilân şehâdetleriyle vech-i şer‘î üzere ba‘de’l-isbât ve’l-half mûcebince meblağ-ı bâkī-yi mezbûr doksan guruşu müteveffâ-yı sânî el-Hâc Hüseyin’in tereke-i vâfiyesinden müdde‘î-i merkūm Hâfız Mustafa’ya edâya merkūm Mehmed’e tenbîh olunduğu huzûr-ı âlîlerine i‘lâm olundu, el-emru li-men-lehü’l-emr. Fî 17 min-Zilka‘deti’ş-şerîfe sene 1152.