Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 368 Hüküm no: 369 Orijinal metin no: [56b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi, Nikola, Angeli ve sâir mellahların Mehmed’in gemisinde çalışmalarının karşılığını alamadıkları yolundaki iddialarını ispatlayamadıkları Ma‘rûz Karadeniz mellâhlarından Yorgi v. Nikola, Nikola v. Todori, Angeli v. Dimitri, Yani v. Kostandi, Petro v. Nikola, İstemad v. Yani, Yorgi v. Dimitri, Kiryako v. Korkandili, Pendali v. Kostantin, Apostol v. Aram, Yani v. Kiro, Pavlo v. Mihal nâm zimmîler bi’t-terâzi Mahkeme-i Bâb’da meclis-i şer‘de derûn-ı arzuhâlde mezkûrü’l-ism el-Hâc Mehmed mahzarında bâ-fermân-ı âlî ta‘yîn olunan ehl-i hibreleri Abdullah Reis hâzır olduğu halde bundan akdem mezbûr el-Hâc Mehmed’in sefînesiyle Köstence İskelesi’nden hınta ve şa‘îr tahmîl edip Âsitâne-i sa‘âdete gelince mezbûr el-Hâc Mehmed ile üleş kavliyle kırk beş gün sefînesinde hizmet edip müddet-i mezbûrda lâzım gelen ücretimizi taleb ederiz deyü her biri da‘vâ ettiklerinde mezbûr el-Hâc Mehmed cevâbında târîh-i i‘lâmdan beş gün mukaddem mezbûrûn ile bî-garaz Müslimîn mahzarlarında hesâb ve kitâbımız görülüp her birinin hisselerine lâzım gelen on dörder buçuk guruşu mesfûrûna def‘ ve teslîm onlar dahi ba‘de’l-ahz ve’l-kabz ücret-i mezkûreye müte‘allıka âmme-i da‘vâdan her biri benim zimmetimi ibrâ ve ıskāt eylediler deyü ba‘de’d-def‘ ve’l-inkâr merkūm el-Hâc Mehmed ber-vech-i muharrer müdde‘âsını lede’t-tezkiye şehâdetleri makbûle olan Ali b. Mehmed ve Mustafa b. Ahmed şehâdetleriyle mesfûrûn muvâcehelerinde vech-i şer‘î üzere isbât etmeğin mûcebince mesfûrûn mellâhlar bî-vech-i şer‘î mu‘ârazadan men‘ olunduğu huzûr-ı âlîlerine i‘lâm olundu, el-emru li-men-lehü’l-emr. Fî 13 min-Zilka‘de sene 1152.