Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 369 Hüküm no: 371 Orijinal metin no: [56b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf’un, hürriyetini ispat etmiş olan Hasan’ın parasını Halil Efendi’den talebinin mümkün olmadığı Ma‘rûz Sâhib-i arzuhâl Yusuf bi’t-terâzi Mahkeme-i Bâb’da meclis-i şer‘de derûn-ı arzuhâlde mezkûrü’l-ism el-Hâc Halil Efendi mahzarında bundan akdem gāib ani’l-beled Said Ağa nâm kimesneden Kalmuk cinsinden olmak üzere Hasan nâm gulâmı yüz guruş semen-i medfû‘ ve makbûza iştirâ eylediğimden sonra gulâm-ı mezbûr bin yüz elli bir senesinde Ahî Çelebi Mahkemesi’nde nâibü’ş-şer‘ olan es-Seyyid Mehmed Hilmi Efendi huzûrunda gulâm-ı mezbûr hürriyetini muvâcehemde ba‘de’d-da‘vâ ve’l-isbât ve’l-hükm mezbûrun semeni olmak üzere medfû‘um olan meblağ-ı mezbûru merkūm Mehmed Said Ağa’dan ben bi’l-mürâca‘a taleb ve da‘vâ etmezden mukaddem gulâm-ı merkūmu merkūm Mehmed Said Ağa’nın babası müteveffâ Zekeriya Ağa’ya bey‘ eden işbu hâzır bi’l-meclis Esirci Mustafa Yazıcı’dan gulâm-ı mezbûrun semeni olmak üzere mezbûr el-Hâc Halil Efendi’nin makbûzu olan yetmiş guruşu merkūm el-Hâc Halil Efendi’den taleb ederim deyü tasaddî eylediği da‘vâsı meşrû‘a olmayıp mezbûr el-Hâc Halil Efendi’ye suâl dahi teveccüh etmemeğin mezbûr Yusuf bi-gayr-ı vechin mu‘ârazadan men‘ olundu, huzûr-ı âlîlerine i‘lâm olundu. Fî 13 min-Zilka‘de sene 1152.