Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 370 Hüküm no: 375 Orijinal metin no: [57a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yoda ile David’in yaptıkları binanın yüksekliği izin verilenin üstünde olduğundan fazla kısmın yıkılması Ma‘rûz Keşf, bâ-mühr-i efendi İ‘lâmı mûcebince hatt-ı hümâyûn-ı şevket-makrûnla mu‘anven verilen emr-i âlî şurûtuna mugāyir kadden on zirâ‘dan ziyâdesi kal‘ olunmak deyü buyruldu. 18 Zilka‘de sene 1152 Ma‘rûz-ı dâ‘î-i devletleridir ki, Sâdır olan fermân-ı âlîlerine imtisâlen bu dâ‘îleri Sermi‘mârân-ı Hâssa el-Hâc Mehmed Ağa kulları ile Unkapanı hâricinde Buğdaycılar içinde vâki‘ Ahî Çelebi Vakfı’ndan olup Miskçi Yoda ile David nâm Yahûdilerin bi’l-münâsafe tasarruflarında olan Yahûdihâne’ye varıp cemm-i gafîr ve cem‘-i kesîr Müslimîn huzûrunda akd eylediğimiz meclis-i şer‘de Unkapanı dâhilinde Yavuzerzâde Sinan Bey mahallesinde sâkinler olup ashâb-ı arzuhâlden el-Hâc Mehmed ve el-Hâc Ahmed ve el-Hâc İsmail ve Mustafa Odabaşı ve diğer el-Hâc Ahmed ve diğer el-Hâc Mehmed ve Yusuf nâm kimesneler ile Hadîce nâm hatun merkūm Yoda ile mesfûr David’in vekîli oğlu İlya muvâcehelerinde işbu mu‘âyene ve müşâhede olunan Yahûdihâne’yi merkūm Yahûdiler bir sene mukaddem üç kat binâ ettiklerinde fevkānîsinde olan odasının birinde üç pencere ve birinde beş pencere ve sofasında dört pencere ihdâs ve dâhil-i surda olan menzillerimizin makarr-ı nisvân olan mevâzi‘-i müte‘addide havâlîsi olup ve deryâ tarafında dahi hakk-ı kanadı olmamağla işbu el-Hâc Halil’in mahzeni üzerlerine penceresi yoğiken iki pencere ihdâs sekiz pencere âmâde edip açmak murâd eylediğinden gayrı birkaç gün içinde bir cihânnümâ ihdâs edip menzilimiz tarafına açdığı iki pencere kezâlik menzilimize ve sâir işbu hâzırûn olan mahallât ahâlîlerine havâle-i şer‘îsi olup ve ebniyede ehl-i İslâm’a on iki ve ehl-i zimmîye on zirâ‘ irtifâ‘ına müsâ‘ade olup hilâfı hatt-ı hümâyûn-ı mu‘anven-i emr-i âlîyle memnû‘ iken mesfûrân Yahûdiler hilâf-ı emr-i âlî işbu Yahûdihâne’yi on beş zirâ‘dan ziyâde irtifâ‘ üzere binâ etmişlerdir, mu‘âyene olunup havâlelerimizi def‘e ve hilâf-ı emr-i âlî binâsının irtifâını hedme tenbîh olunmak murâdımızdır deyü da‘vâ ettiklerinde Yahûdihâne-i mezbûrenin fevkānîsinde olan iki odasında ve sofasında ber-vech-i muharrer ihdâs eylediği pencerelerden müdde‘iyûn-ı mezbûrûnun derûn-ı kal‘ada olan menzillerinin makarr-ı nisvân olan mevâzi‘lerine havâlesi olduğu müşâhede ve mahzenler tarafına ihdâs eylediği pencerelerinin hakk-ı kanadı olmadığı mu‘âyene olundukdan sonra mûmâ-ileyh el-Hâc Mehmed Ağa kulları mimâr halîfelerinden Hüseyin Halîfe ve el-Hâc Mustafa Halîfe ile ebniye-i mezbûrenin kaddini mesâha eylediklerinde arsadan cihânnümâsının kaddi on altı buçuk zirâ‘ ve fevkānî odalarının kaddi on üç buçuk zirâ‘ olduğu müte‘ayyen oldukdan sonra fi’l-hakīka merkūmânın cihânnümâsı altı buçuk fevkānî odasının üç buçuk zirâ‘ irtifâ‘-ı binâsı hilâf-ı emr-i âlî olduğunu el-Hâc Mehmed Ağa kulları dahi mütevellî-yi vakf muvâcehesinde haber verdiği ma‘lûm-ı devlet-i aliyyeleri oldukda ol bâbda emr ü fermân hazret-i men-lehü’l-emrindir. Fî 13 Z sene 1152.