Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 371 Hüküm no: 376 Orijinal metin no: [57a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Demirci esnafının yamaklık konusunda kuyumculara taarruzda bulunmaması Bâ-mühr-i efendi Ma‘rûz Demirciler kethüdâsı sâhib-i arzuhâl Yusuf meclis-i şer‘de kuyumcuların ehl-i hibreleri Mehmed Çelebi ile derûn-ı arzuhâlde zikr olunduğu üzere kuyumcu esnafı demirci esnafına yamak olmağla teşrîfât defteri mûcebince güzeşte senede lâzım gelen on iki bin akçe esnaf-ı mezbûreden taleb ederim deyü da‘vâ ettikde merkūm Mehmed Çelebi’nin işbu sene Muharremi târîhiyle müverrah yedine verilen tuğrâlı emr-i âlîşânda kuyumcu esnafı kadîmden kalıpcı esnafına yamak olup demirci esnafının sonradan kendilerine yamak olmak üzere düşürdükleri kayıdları mahallinden terkīn ve ba‘de’l-yevm demirci esnafından ber-vech-i muharrer ta‘arruz olunmamak üzere tasrîh olunmağla ber-mûceb-i emr-i âlî kuyumcu esnafına ta‘arruz etmemek üzere kethüdâ-yı merkūm Yusuf’a tenbîh olunduğu huzûr-ı âlîlerine i‘lâm olundu. El-emru li-men-lehü’l-emr. Fî 17 min-Zilka‘de sene 1152.