Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 372 Hüküm no: 378 Orijinal metin no: [57a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud’un para ve eşyalarının zorla alındığına dair iddiasını ispatlayamadığı Muhzır Hasan mübâşeretiyle Bâb Mahkemesi’nde ihzâr olunan Mahmud b. Mustafa’nın hasmı es-Seyyid Mahmud meclis-i şer‘de târîh-i i‘lâmdan üç sene mukaddem Eğin kasabasında merkūm Mahmud beni habs edip otuz guruş kıymetli bir re’s kır bargir ve yedi Mısır zincirlisi ve her keyli birer guruşdan on keyl soğan ki cem‘an altmış dört guruş bir rub‘ guruşumu bi-gayr-ı hakkın ahz u kabz etmekle zikr olunanların aynları mevcûd ise aynlarını müstehlek ise ba‘de’s-sübût kıymet-i şer‘îlerini merkūm Mahmud’dan taleb ederim deyü da‘vâ ol dahi cevâbında zikri sebk eden Eğin kasabası ahâlîsinden Nüzûl Emîni Mehmed Ağa’nın mezbûr es-Seyyid Mahmud zimmetinde ber-mûceb-i temessük cihet-i deyn-i şer‘îden altmış iki guruş hakkı olmağla merkūm Mehmed Ağa tarafından vekâleten kasaba-i mezbûrede huzûr-ı hâkimü’ş-şer‘de merkūm Mahmud’dan ba‘de’d-da‘vâ ve’l-isbât ve’l-hükm müdde‘î-i mezbûrun takrîr-i meşrûhu üzere zikr olunan bargir ve soğan ve yedi altın ki cem‘an altmış iki guruş olmak üzere kasaba-i mezbûre serdârı ma‘rifetiyle tahsîl ve bana teslîm ben dahi bi’l-vekâle ahz u kabz eyledim deyü ba‘de’d-def‘ ve’l-inkâr mezbûr Mahmud ber-vech-i muharrer def‘-i mezkûrunu Mustafa b. Musa ve Abdünnebi b. İbrahim nâm şâhidân-ı mu‘addilân şehâdetleriyle merkūm es-Seyyid Mahmud muvâcehesinde isbât etmeğin mûcebince müdde‘î-i mezbûr es-Seyyid Mahmud bi-gayr-ı vechin mu‘ârazadan men‘ olunduğu huzûr-ı âlîlerine i‘lâm olundu. 19 Zilka‘de sene 1152.