Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 71 Hüküm no: 65 Orijinal metin no: [13a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi ve annesi Nefise ile karısı Hatice’nin ortaklaşa sahibi oldukları bağı Kasap Todoraki’ye sattıkları Medîne-i Üsküdar’a muzâfe Adalar nâhiyesine tâbi‘ Dolayoba karyesinde sâkin es-Seyyid Ahmed b. es-Seyyid Abdi kendü nefsinden asâleten ve vâlidesi Nefise bt. Ahmed [nâm] hatun ve zevcesi Hadîce bt. Molla Mustafa hatun taraflarından ber-vech-i âti’l-beyanda vekîlleri olduğu zât-ı mezbûretânı bi’l-ma‘rifeti’ş-şer‘iye ârifân olan İsmailoğlu Mehmed Beşe b. Mustafa ve Kalyoncu Mehmed Beşe b. Salih ve Bulgar Osman Beşe b. Hasan nâm kimesneler şehâdetleriyle sâbitü’l-vekâleleri olup vekâleti meclis-i şer‘-i hatîr-i lâzimü’t-tevkīrde işbu râfi‘ü’r-rakīm Kasab Todoraki v. Petro zimmî muvâcehesinde ikrâr ve takrîr-i kelâm edüp akd-i âti’z-zikrin sudûruna değin müvekkilân-ı mezbûretân ile yedimizde mülk-i mevrûsumuz olup karye-i mezbûre toprağında Zeytinliağıl altında vâki‘ bir tarafdan mezbûr Kalyoncu Mehmed Beşe bağı ve bir tarafı es-Seyyid Salih bağı ve bir tarafı Fâtıma Hatun bağı ve bir tarafı tarîk-i âm ile mahdûd ve tahmînen altı buçuk dönüm ve benim Molla’dan iştirâ eylediğim bir buçuk dönüm cem‘an sekiz dönüm kürûmî mülk bir kıt‘a mahlût eşcâr-ı müsmire ve gayrı müsmire[yi] hâvî dut ve çavuş bağımızı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müşterî-i mesfûre zimmîye üç yüz otuz beş guruşa bey‘ u teslîm ve temlîk eylediğimizde ol dahi ber-vech-i muharrer iştirâ ve tesellüm ve temellük ve kabz u kabûl eyledikden sonra semeni olan meblağ-ı mezkûr üç yüz otuz beş guruşu müşterî-i mesfûr zimmî yedinden her birimiz bi-kadri’l-hısas tamâmen ahz ü kabz eyleyüp fîmâ-ba‘d mârrü’z-zikr bağda vechen mine’l-vücûh ve sebeben mine’l-esbâb kat‘â ve kātıbeten ve [a]sâleten ve vekâleten alâka ve medhalimiz kalmayup müşterî-i merkūm Todoraki zimmînin mülk-i müşterâsı ve hakk-ı sırf-ı sahîh-i olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’r-râbi‘ aşer min-Şa‘bâni’l-mu‘azzam li-sene seb‘a ve seb‘în ve mi’ete ve elf. Şuhûdü’l-hâl: el-Hâc Süleyman b. Ahmed, Halil Beşe b. Ahmed, Pazarköylü İbrahim Beşe, Abdullah Beşe b. Bulgar Osman, Mustafa Beşe b. Osman, Çobanoğlu Mustafa Beşe, Çobanoğlu İbrahim Beşe, Çobanoğlu Mehmed Beşe, Çoban Alioğlu Mustafa Beşe.