Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 72 Hüküm no: 66 Orijinal metin no: [13a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Pirafil’in evini oğluna sattığı Medîne-i Üsküdar’a muzâfe Adalar nâhiyesine tâbi‘ Maldepe karyesinde mütemekkin Nikola v. Pirafil nâm zimmî meclis-i şer‘-i hatîr-i lâzimü’t-tevkīrde sulbî kebîr oğlu bâ‘isü’r-rakīm Pirafil zimmî muvâcehesinde bi-tav‘ihi ikrâr ve takrîr-i kelâm edüp akd-i âti’z-zikrin sudûruna değin yedimde mülküm olup karye-i mezkûrede vâki‘ iki tarafı Aleksi menzili ve bir tarafı İslambollu Manol veresesi bahçeleri ve tarafeyni tarîk-i âm ile mahdûd fevkānî bir bâb oda ve bir sofa vasatında üç bâb oda ve bir kenîf ve tahtında mahzen ve bir mikdâr avlu eşcâr-ı müsmire ve gayrı müsmireyi hâvî bahçe ve bi’r-i mâ ve bir mermer dibek ve ahır ve sokak kapısını müştemil mülk menzilimi bi cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî ve şurût-ı müfsideden ârî bey‘-i bâtt-ı [13b] sahîh-i şer‘î ile müşterî-i merkūm oğlum Pirafil zimmîye beş yüz guruşa bey‘ u teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabz u kabûl edüp semeni olan meblağ-ı mezkûr beş yüz guruşun yüz elli guruşu[unu] yedinden tamâmen ahz ü kabz ve kabûl eyleyüp semen-i meblağ-ı bâkī üç yüz elli guruşun mutâlebesinden müte‘allıka âmme-i da‘vâdan oğlum Pirafil zimmînin zimmetini ibrâ-i âm ve kātı‘ü’n-nizâ‘la ibrâ ve iskāt eyledim fîmâ-ba‘d mârrü’z-zikr menzilde vechen mine’l-vücûh ve sebeben mine’l-esbâb benim alâka ve medhalim kalmayup oğlum müşterî-i merkūm Pirafil zimmînin mülk-i müşterâsı ve hakk-ı sırf-ı sahîhi olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’s-sâbi‘ aşer min-şehri Ramazani’l-mübârek li-sene tis‘a ve seb‘în ve mi’ete ve elf. Şuhûdü’l-hâl: Abdülkadir b. Hasan, Süleyman Beşe b. Hüseyin, Ali Beşe b. Ali, Selim Beşe b. Ömer, Kasım b. Ahmed, Molla Ömer b. Abdurrahman, Müezzin Molla Mustafa ve gayruhum. Kores v. Todoraki, Demiroğlu Petro, Apostol v. Anaştaş, Anaştaş Horbacı [Çorbacı], Nikola.