Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 383 Hüküm no: 403 Orijinal metin no: [59a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun ile boşandığı Hüseyin Ağa arasındaki eşya ve mülk ev davasında sulh sağlandığı Ma‘rûz Zâtı ta‘rîf-i şer‘î ile mu‘arrefe olan sâhibe-i arzuhâl Âişe Hatun bi’t-terâzi Bâb Mahkemesi’nde meclis-i şer‘de derûn-ı arzuhâlde mezkûr zevc-i sâbıkı Hüseyin Ağa muvâcehesinde mezbûr Hüseyin Ağa zevciyet beynimizde kāim iken mecmû‘u yedi yüz guruş kıymetli eşyâ-i memlûkemden bir altın kuşak ve bir mücevher kuşak ve bir pandül sâ‘at ve yirmi miskāl bir çift altın bilezik ve bir kakum kürk ve bir re’s Gürciyyetü’l-asl câriyemi bi-gayr-ı hakkın yedimden ahz ettiğinden mâ‘adâ mahmiye-i İstanbul’da Baba Hasan Alemî mahallesinde vâki‘ ma‘lûmü’l-hudûd ve’l-müştemilât mülk menzilimin nısf-ı şâyi‘ini dahi mezbûr Hüseyin Ağa’ya yüz altmış guruşa bey‘ ve temlîk ve semeninden zimmetini ibrâ etmiş idim, mârrü’z-zikr eşyâyı mezbûr Hüseyin’e i‘âde taleb ve da‘vâ sadedinde olduğumda beynimizde muslihûn tavassut edip mezbûr Hüseyin Ağa nısf menzil-i mezkûru bana temlîk ettikde ben dahi temellük ve kabûl edip eşyâ-i muharrere-i mezkûra ve sâire müte‘allıka âmme-i da‘vâdan mezbûr Hüseyin Ağa’nın zimmetini ibrâ ve ıskāt eylediğimde mezbûr Hüseyin Ağa’nın benden müdde‘âsı olan iki güğüm ve bir tepsi ve bir bakır gülâbdân ve iki beylik çuka ve bir kebeyi yedimden ahz u kabz eyleyip husûs-ı merkūma ve sâire müte‘allıka âmme-i da‘vâdan benim zimmetimi ibrâ ve ıskāt edip ol vechile kat‘-ı nizâ‘ eyledik deyü takrîri ba‘de’t-tasdîk tescîl ve huzûr-ı âlîlerine i‘lâm olundu. El-emru li-men-lehü’l-emr. Fî 26 min-Zilka‘de sene 1152.