Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 384 Hüküm no: 404 Orijinal metin no: [59a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Pamukçu İbrahim’e borcu olan Hallâc İbrahim’in parayı ödemesi Ma‘rûz Derûn-ı arzuhâlde mezkûr müteveffâ Penbeci el-Hâc Mehmed b. el-Hâc İbrahim b. Hacı Ali’nin sulbî kebîr oğlu ve hasren vârisi olan sâhib-i arzuhâl Hâfız Molla Mustafa Mahkeme-i Bâb’da meclis-i şer‘de Hallâc tâifesinden İbrahim mahzarında babam müteveffâ-yı mezbûr hayâtında mezbûr İbrahim’e ma‘lûmü’l-vezn bey‘ ve teslîm eylediği penbe semeninden bâkī yüz kırk iki guruş hakkı olmağla kable’l-ahz babam mezbûr vefât edip meblağ-ı mezbûr bana mevrûs olmağla târîh-i i‘lâmdan iki sene mukaddem meblağ-ı bâkī-yi mezbûr yüz kırk iki guruşu taleb eylediğimde merkūm İbrahim ber-vech-i muharrer penbe semeninden zimmetinde yüz kırk iki guruş deyni olduğunu lede’ş-şuhûd ikrâr dahi etmiş idi deyü ba‘de’d-da‘vâ ve’l-inkâr müdde‘î-i mezbûr ber-vech-i meşrûh müdde‘âsını lede’t-tezkiye adâletleri zâhir olan Halil b. Hüseyin ve Süleyman b. Abdullah şehâdetleriyle merkūm İbrahim muvâcehesinde vech-i şer‘î üzere isbât etmeğin mûcebince meblağ-ı bâkī-yi mezbûr yüz kırk iki guruşu müdde‘î-i mezbûr Hâfız Molla Mustafa’ya edâ ve teslîme merkūm İbrahim’e tenbîh olunduğu huzûr-ı âlîlerine i‘lâm olundu. El-emru li-men-lehü’l-emr. Fî 26 min-Zilka‘deti’ş-şerîfe sene 1152.