Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 385 Hüküm no: 406 Orijinal metin no: [59b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simkeşhane ustalarının yanlarına şakird ve köle almalarına izin verilmesi Sîmkeşhâne ustalarından Sîmkeşbaşı Mehmed Ağa ve kethüdâları diğer Mehmed Ağa ve Yiğitbaşı Osman ve kılâbdâncı ustalarından çıkrık sâhibleri Mustafa Çelebi b. Ahmed ve el-Hâc İbrahim b. Mustafa ve diğer İbrahim b. Ahmed ve sâir müseccelü’l-esâmî Müslim ve zimmî ustalar meclis-i şer‘de Sîmkeşhâne Mukāta‘ası Emîni Abdullah Ağa tarafından vekîli olan mukāta‘a-i mezbûre kâtibi es-Seyyid Mustafa Efendi hâzır olduğu halde işbu yedimizde olan i‘lâm nâtık olduğu üzere hırfetimiz erbâbı kırk yedi senesinde sekiz seneye değin san‘atımıza şâkird ve köle almamak üzere ittifâk edip mûcebince emir dahi ısdâr ettirmiş idik, ancak kalfalarımız cevr ü ezâların terakkī eylediklerinden mâ‘adâ ol vakitden beri ba‘zı mertebe inkırâz dahi bulup el-yevm şâkird ve köle alıp san‘atımızı ta‘lîme muhtâc olduğumuza binâen kadîmî üzere şâkird ve köle almazdan mukāta‘a-i mezbûre mâlına kat‘â noksân gelmeyip nef‘i olmağla mukaddem olan hilâf-ı şer‘î ittifâkımıza amel olunmayıp kadîmî üzere şâkird ve köle almamıza muhâlefet olunmamak bâbında yedimize fermân-ı âlî ihsân olunmak cümlemizin murâdıdır dediklerinde hakīkat-i hâl takrîr-i meşrûhları üzere olduğunu mukāta‘a-i mezbûre kâtibi vekîl-i mezbûr es-Seyyid Mustafa Efendi dahi tasdîk etmeğin esnaf-ı mezbûrenin takrîrleri üzere ba‘de’l-yevm san‘atlarına şâkird ve köle almalarına hilâf-ı şer‘î mümâna‘at olunmamak bâbında yedlerine emr-i âlîşân ihsân olunması ricâsında oldukları huzûr-ı âlîlerine i‘lâm olundu. El-emru li-men-lehü’l-emr. Fî 29 Zil‘ka‘de sene 1152.