Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 385 Hüküm no: 407 Orijinal metin no: [59b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail’in, İbrahim tarafından bıçaklandığını ispatlayamadığı Ma‘rûz Arzuhâlde mezkûrü’l-ism Kıbtî Ali b. Hüseyin b. Ali’nin li-ebeveyn er karındaşı ve tarafından vekîl-i sâbitü’l-vekâlesi İsmail bi’t-terâzi Mahkeme-i Bâb’da meclis-i şer‘de yine Kıbtî tâifesinden arzuhâlde isimleri mezkûr el-Hâc İbrahim b. Hasan ve Uzun Ahmed b. Sefer’den müvekkilim mezbûr Ali târîh-i i‘lâmdan on bir gün mukaddem medîne-i Üsküdar’da Selamsız mahallesinde vâki‘ merkūm el-Hâc İbrahim’in menziline müsâferet tarîkı ile vardıkda müvekkilim mezbûrun mezbûr Uzun Ahmed iki ellerini tutup ve merkūm el-Hâc İbrahim beyâz kabzalı bıçak ile arkasının belinden darb ve cerh etmekle mûcib-i şer‘îsini mezbûrândan taleb ederim deyü ba‘de’d-da‘vâ ve’l-inkâr vekîl-i mezbûr İsmail ber-vech-i muharrer müdde‘âsını beyâna kādir olmamağla talebiyle mezbûrân el-Hâc İbrahim ve Uzun Ahmed’e vech-i şer‘î üzere yemîn verilmeğin mûcebince vekîl-i mezbûr İsmail bilâ-beyyine bî-vech mu‘ârazadan men‘ olunduğu huzûr-ı âlîlerine i‘lâm olundu. Fî-selhi Zilka‘de sene 1152.