Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 386 Hüküm no: 408 Orijinal metin no: [59b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun’un kendisine ömür boyu bakmak şartıyla Hüseyin’e verdiği evin iadesi Ma‘rûz Muhzır Mustafa mübâşeretiyle Bâb Mahkemesi’ne ihzâr olunan Hüseyin nâm kimesnenin hasmı Emine Hatun huzûr-ı şer‘de zikri âtî vakfın câbîsi ve mütevellî vekîli Ahmed nâm kimesne hâzır iken İstanbul’da Davud Paşa Mahkemesi’nde vâki‘ Ali Ağa nâm sâhibü’l-hayrın vakfı müsakkafâtından on altı bâb müteehhilîn odalarında lede’l-ahâlî ma‘lûmü’l-hudûd ve’l-müştemilât bi’l-icâreteyn mutasarrıfa olduğum bir bâb menzilin nısfını bundan akdem beni ölünce beslemek şartıyla bâ-ma‘rifet-i mütevellî-yi mezbûr Hüseyin’e meccânen ferâğ ve kasr-ı yed etmiş idi, lâkin şart-ı mezbûr müfsid-i ferâğ olduğuna binâen nısf menzil-i mezbûrdan kasr-ı yedine mezbûr Hüseyin’e tenbîh olunsun deyü da‘vâ eyledikde mezbûr Hüseyin dahi müdde‘iye-i mezbûrenin bi’l-cümle takrîr-i meşrûhu üzere olduğunu ikrâr ve i‘tirâf etmeğin alâ-mûcib-i i‘tirâfihî bâ-ma‘rifet-i mütevellî nısf menzil-i mezbûrdan kasr-ı yedine mezbûr Hüseyin’e tenbîh olunduğu huzûr-ı âlîlerine i‘lâm olundu. Fî-selhi Zilka‘de sene 1152.