Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 388 Hüküm no: 414 Orijinal metin no: [60a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ebubekir’e borcu olan Ömer’in parayı varisi Fatıma Hatun’a ödemesi Ma‘rûz Müteveffâ es-Seyyid Ebubekir b. Ömer b. Abdurrahman’ın sulbî sagīr oğlu sâhib-i arzuhâl es-Seyyid Mustafa’nın vâlidesi ve tesviye-i umûruna kıbel-i şer‘den vasiyy-i mansûbesi olup zâtı ta‘rîf-i şer‘î ile mu‘arrefe olan Fâtıma bt. Hüseyin nâm hatun Mahkeme-i Bâb’da meclis-i şer‘de asâleten ve vesâyeten derûn-ı arzuhâlde mezkûr Ömer b. Süleyman mahzarında mûrisim müteveffâ-yı mezbûr es-Seyyid Ebubekir fevtinden dört sene mukaddem Samatya kapısı dâhilinde vâki‘ kömürcü mahzeninde merkūm Ömer’e kendi mâlından yetmiş guruş ikrâz ve teslîm ol dahi ber-vech-i muharrer istikrâz ve teslîm ve kendi mesârifine sarfla istihlâk ettikden sonra mûrisimiz mezbûr meblağ-ı mezbûr yetmiş guruşu kable’l-ahz ve’l-istîfâ vefât edip meblağ-ı mezbûr bize mevrûs olmağın meblağ-ı mezbûr yetmiş guruşu asâleten ve vesâyeten mezbûr Ömer’den taleb ederim deyü da‘vâ eyledikde ol dahi bi’l-vekâle inkâr etmeğin müdde‘iye-i mezbûre ber-vech-i meşrûh müdde‘âsını lede’t-tezkiye şehâdetleri makbûle olan el-Hâc Süleyman b. Ahmed ve Mehmed Efendi b. İbrahim şehâdetleriyle merkūm Ömer muvâcehesinde vech-i şer‘î üzere isbât etmeğin mûcebince meblağ-ı mezbûr yetmiş guruşu müdde‘iye-i mezbûre Fâtıma Hatun’a edâ ve teslîme merkūm Ömer’e tenbîh olunduğu huzûr-ı âlîlerine i‘lâm olundu. El-emru li-men-lehü’l-emr. Fî-gurreti Zilhicce sene 1152.