Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 390 Hüküm no: 417 Orijinal metin no: [60a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber dükkânının kiracısı Ömer’in birikmiş kirayı ödeyerek dükkânı tahliyesi Ma‘rûz İsmail Odabaşı nâm kimesne asâleten ve Âişe nâm sagīrenin vâlidesi ve vasiyesi Ümmühani nâm hatun tarafından sâbitü’l-vekâle vekîl olmağla vekâleten meclis-i şer‘de derûn-ı arzuhâlde mezkûr es-Seyyid Ömer mahzarında Kırkçeşme kurbünde ber-vech-i iştirâk mutasarrıf olduğumuz bir bâb berber dükkânında mezbûr es-Seyyid Ömer beher mâh birer buçuk guruş icâre ile müşâhereten müste’cir olup dükkân-ı mezbûr icâresinden zimmetinde sekiz guruş kalmağla meblağ-ı mezbûr ile dükkân-ı mezbûru tahliye ve bana teslîme mezbûr es-Seyyid Ömer’e tenbîh olunmak murâdımdır deyü da‘vâ eyledikde ol dahi ber-vech-i muharrer müste’cir olduğunu ikrâr lâkin meblağ-ı mezbûru bi’t-tamâm kendüye teslîm eyledim deyü ba‘de’d-def‘ ve’l-inkâr müdde‘î-i mezbûr es-Seyyid Ömer def‘-i mezkûru beyâna kādir olmayıp talebiyle mezbûr İsmail odabaşıya vech-i şer‘î üzere yemîn verilip mûcebince meblağ-ı mezbûr sekiz guruşu edâya mezbûr es-Seyyid Ömer’e ba‘de’t-tenbîh ve târîh-i i‘lâmdan on iki gün tamâmında dahi bi’t-terâzi dükkân-ı mezkûru tahliye ve müdde‘î-i mezbûra rızâsıyla teslîme mezbûr es-Seyyid Ömer ta‘ahhüd eylediği Bâb Mahkemesi’nde tescîl ve huzûr-ı âlîlerine i‘lâm olundu. Fî-gurreti Zilhicce sene 1152.