Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 390 Hüküm no: 418 Orijinal metin no: [60a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccarın getirdiği zahireyi Balkapanı’na getirip tartısını yaptırmadan başka yerlerde gizlice satmaması Ma‘rûz Sâhib-i arzuhâl Balkapanı Vezzânı Hasan meclis-i şer‘de tüccârın taşradan sefâin ile getirdikleri zehâyirin gümrüklerini edâ edip Âsitâne’de olan esnafa tevzî‘ olunmak için kadîmden Balkapanı’na getirip kapan-ı mezbûrdan tevzî‘ esnâsında vezn olunup şirâ edenlere taksîm olunmak mu‘tâd iken ba‘zıları getirdikleri zehâyiri gümrük önünden Balkapanı’na getirmedin hufyeten kaçırıp ve ba‘zıları dahi kapan-ı mezbûrdan vezn olunmadın bey‘ ü şirâ edip tarafeynden biri mağbûn olup bu tarîkıyle kapandan kaldırmak nâsa muzır olmağla men‘ olunmak murâdımdır deyü teşekkî eyledikde fi’l-vâki‘ tüccârın ber-vech-i muharrer sefâin ile getirdikleri zehâyirin gümrüğünü edâdan sonra Balkapanı’na tamâmen gelmesi mu‘tâd ve nizâmları dahi bu gûne olmağla ba‘de’l-yevm zehâyir-i mezbûrun gümrüğü edâ olundukdan sonra gümrük hamâlları zehâyir-i merkūmu doğru Balkapanı’na kaldırıp esnaf dahi şirâ edip tevzî‘ eyledikleri esnâda vezn olunmadın zehâyir-i mezbûreyi kaldırmamak nâsa dahi enfa‘ olmağla vezzân-ı mezbûr Hasan ber-vech-i muharrer yedine tuğrâlı emr-i âlîşân ihsân olunması ricâsında olduğu huzûr-ı âlîlerine i‘lâm olundu. Fî-gurreti Zilhicce sene 1152.