Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 391 Hüküm no: 419 Orijinal metin no: [60b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Mehmed’in kölesi Yusuf’un Acem asıllı olduğu iddiasını ispatlayamadığı Ma‘rûz Rıkk-ı sâbıkını mu‘terif olup kıbel-i şer‘den da‘vâya me’zûn olan çatık kara kaşlı, kara gözlü, takrîben on altı yaşında, sâhib-i arzuhâl Yusuf nâm mürâhık Bâb Mahkemesi’nde meclis-i şer‘de derûn-ı arzuhâlde mezkûrü’l-ism Tütüncü Mehmed Beşe mahzarında, mezbûr Mehmed Beşe bana Gürciyyü’l-asl rakīkı olmak üzere târîh-i i‘lâmdan üç sene mukaddem beni yedi sene tamâmına değin kitâbete kat‘ etmiş idi. Lâkin ben bâ-fermân-ı âlî sebîlleri tahliye olunan Müslimiyyü’n-neseb Acem cinsinden olmağla sebîlim tahliye olunmak murâdımdır deyü tasaddî eylediği da‘vâsından mevsûf-ı mezbûr Yusuf, babası ve dedesi ve anası isimlerini bilmeyip bir vechile tashîh-i da‘vâ eylemeyip mezbûr Mehmed Beşe’ye suâl dahi teveccüh etmemeğin mûcebince mevsûf-ı mezbûr Yusuf’a mevlâsı mezbûr Mehmed Beşe’ye yedinde olan hüccet-i şer‘iyye mantûkunca dört sene dahi hizmet etmek üzere tenbîh olunduğu tescîl ve huzûr-ı âlîlerine i‘lâm olundu. Fî 2 min-Zilhicce sene 1152.