Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 391 Hüküm no: 420 Orijinal metin no: [60b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Mirza’ya borcundan dolayı hapiste olan ve malı mülkü olmayan Avanes’in hapisten çıkarılması Ma‘rûz Sâhib-i arzuhâl mahbûs Avanes zimmînin derûn-ı arzuhâlde mezkûr Sarrâf Mirza zimmîye ber-mûceb-i i‘lâm dört yüz kırk guruşdan bâkī üç yüz on guruş deyni olduğunu ikrârıyla sâbit oldukdan sonra mahbûs-ı mezbûr Avanes zimmînin hâlâ ve def‘aten edâya iktidârı olmayıp lâbis olduğu köhne libâsdan gayrı ism-i mâl ıtlâk olunur bir nesnesi olmayıp mu‘dim ve mu‘sir ve müflis olduğunu vukūf-ı tâmları olan Serpûşcular Yiğitbaşısı Süleyman b. İbrahim ile esnaf-ı mezbûreden dört nefer müseccelü’l-esâmî Müslim ve on nefer mazbûtü’l-esâmî zimmîler sarrâf-ı merkūm Mirza muvâcehesinde alâ-tarîkı’ş-şehâde haber vermeleriyle mezbûr Avanes zimmînin si‘at-i hâle değin habsi meşrû‘ olmamağla habsden şer‘an ıtlâk olunmak iktizâ eylediği huzûr-ı âlîlerine i‘lâm olundu. El-emru li-men-lehü’l-emrindir. Fî 3 Z sene 1152.