Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 392 Hüküm no: 422 Orijinal metin no: [60b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim’e olan borcunu ödemesi için Agob’a otuz bir gün mühlet verildiği Ma‘rûz Muhzır el-Hâc Mustafa mübâşeretiyle Bâb Mahkemesi’nde ihzâr olunan Agob zimmînin hasmı el-Hâc İbrahim meclis-i şer‘de, mezbûr Agob zimmetinde cihet-i karzdan beş yüz guruş hakkım olmağla meblağ-ı mezbûr mukābelesinde Küçük Ayasofya Vakfı’ndan Kiremit mahalllesinde vâki‘ ma‘lûmü’l-hudûd ve’l-müştemilât tasarrufunda olan menzilini bundan akdem rehin olmak üzere bâ-ma‘rifet-i mütevellî bana ferâğ etmekle ben dahi menzil-i mezkûru beher mâh beşer guruşa kendüye îcâr eylediğimde icâre-i mezkûreden yirmi dört ayda zimmetinde yüz on guruş müctemi‘ olmağın hâlâ fekk-i rehn-i mezkûr edip karzdan olan meblağ-ı mezbûr beş yüz guruş ile icâreden müctemi‘ olan yüz on dokuz guruş ki cem‘an altı yüz on dokuz guruşu taleb ederim deyü da‘vâ ol dahi ber-vech-i muharrer ikrâr ve i‘tirâf etmeğin mûcebiyle meblağ-ı mezbûr altı yüz on dokuz guruşun edâsıyla merkūm Agob ilzâm olundukdan sonra târîh-i i‘lâmdan otuz bir gün tamâmına değin mezbûr Agob zimmî tecîl olunduğu huzûr-ı âlîlerine i‘lâm olundu. Fî 3 Zilhicce sene 1152.