Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 393 Hüküm no: 423 Orijinal metin no: [60b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölmüş olan Yamandi’nin vefat eden Mehmed Beşe’ye borcu olduğunun ispatlanamadığı Bâ-mühr-i efendi Ma‘rûz Hâce Hamamı kurbünde sâkin iken bundan akdem fevt olan Mehmed Beşe’nin hasren vârisi olan vâlidesi Emine Hatun’un zevci ve tarafından vekîl-i sâbitü’l-vekâlesi diğer Mehmed dîvân-ı âlîlerinde Varanca karyesinden Yamandi nâm hâlikin zevcesi sâhibe-i arzuhâl Farniye nâm Nasrâniyeden zevcim müvekkile-i mezbûre Emine’nin mûrisi oğlu Mehmed Beşe’nin işbu temessük mûcebince hâlik-i merkūm zimmetinde olan yüz yetmiş sekiz guruşdan makbûzundan bâkī yüz on sekiz guruşu müvekkile-i mezbûreye mevrûs olmağla bi’l-vekâle taleb ederim deyü ba‘de’d-da‘vâ ve’l-inkâr vekîl-i mezbûr bi’d-defa‘ât imhâl olunup her birinde mehil tamâm olunup ityân-ı beyyineye kādir olmamağla vekîl-i merkūm bî-vech mu‘ârazadan men‘ olunduğu huzûr-ı âlîlerine i‘lâm olundu. Bâkī emr ü fermân men-lehü’l-emrindir. Fî 5 R sene 1152.