Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 398 Hüküm no: 435 Orijinal metin no: [61b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbetçi Mustafa’nın vefatıyla varislerden Zekeriya’nın diğer varislere şerbetçi dükkânındaki haklarını vermesi Bâ-emr-i efendi Ma‘rûz Derûn-ı [arzuhâlde] mastûr husûsun mahallinde istimâ‘i’çün savb-ı şer‘-i enverden irsâl olunan vekāyi‘ kâtibimiz el-Hâc Abdullah Efendi dâ‘îleri Yeni Câmi‘ kurbünde attârlar çarşısında vâki‘ Attârân Kethüdâsı el-Hâc Osman’ın dükkânında akd eylediği meclis-i şer‘de arzuhâlde mezkûr müteveffâ Şerbetci Mustafa’nın verâseti zevcesi Âişe ile kebîr oğlu Zekeriya’ya ve kebîre kızları sâhibât-ı arzuhâl Halime ve Hadîce ve Ümmühani’ye münhasıra olduğu şer‘an müte‘ayyen oldukdan sonra mezbûrât Halime ve Hadîce ve Ümmühani taraflarından bâ-hüccet-i şer‘iyye vekîl-i sâbitü’l-vekâleleri Mustafa meclis-i mezbûrda sûk-ı mezbûr kurbünde vâki‘ tereke-i müteveffâ-yı mezbûrdan olmak üzere bir bâb şerbetci dükkânına vaz‘-ı yedi sâbit olan mezbûr Zekeriya’dan mezbûr şerbetci el-Hâc Mustafa dört sene mukaddem fevt oldukda oğlu mezbûr Zekeriya dükkân-ı mezbûr içinde mevcûd işbu defterimiz nâtık olduğu üzere dört yüz guruşluk evân-ı nühâsiye ile sekiz yüz guruş kıymetli envâ‘-ı eşribe ve gülbe şeker ve reçel ve şeker ve asel kabz edip hattâ cem‘an bin iki yüz guruşluk eşyâ-i mezbûreyi tereke-i müteveffâ-yı mezbûrdan olmak üzere kabz eylediğini alâ-ruûsi’l-işhâd ikrâr ve i‘tirâf etmeğin hâlâ dükkân-ı mezbûrdan yüz on guruşluk evânî-i nühâsiye mevcûd olup mâ‘adâsını istihlâk etmekle istihlâk eylediği bin doksan guruşdan müvekkilât-ı mezbûrâtın hisseleri olan beş yüz seksen beş guruşu bi-tarîkı’z-zamân mezbûr Zekeriya’dan bi’l-vekâle taleb ederim deyü ba‘de’d-da‘vâ ve’l-inkâr vekîl-i mezbûr müdde‘âsını lede’t-tezkiye adâletleri zâhir olan Sultan Bayezid-i Veli Câmi‘-i şerîfi hatîbi Mustafa Efendi ve Ali Paşa-i Cedîd Câmi‘-i şerîfi hatîbi es-Seyyid Yahya Efendi ve Hasan Efendi ve Molla Abdullah ve Kayyım es-Seyyid Mehmed nâm kimesneler şehâdetleriyle vech-i şer‘î üzere isbât eylediğini mevlânâ-yı mezbûr mahallinde ba‘de’t-tahrîr ma‘an ba‘s olunan ümenâ-i şer‘le meclis-i şer‘a gelip alâ-vukū‘ihi ba‘de’l-inhâ müvekkilât-ı mezbûrâtın meblağ-ı mezbûrdan hisseleri olan beş yüz seksen beş guruşu edâya mezbûr Zekeriya’ya tenbîh olunduğu huzûr-ı âlîlerine i‘lâm olundu. Bâkī emr ü fermân men-lehü’l-emrindir. Fî 5 min-Zilhicce sene 1152.