Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 399 Hüküm no: 436 Orijinal metin no: [61b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Unkapanı’nın tamire ihtiyacı olduğu Bâ-mühr-i efendi Derûn-ı arzuhâlde mezkûr husûsu tefahhus ve suâl için taraf-ı şer‘den irsâl olunan vekāyi‘ kâtibimiz el-Hâc Abdullah Efendi Unkapanı’nda Unkapanı nâibi ikāmet eylediği mahalle varıp kapan navluncularından ve ekmekçi tâifesinden otuz neferden mütecâviz müseccelü’l-esâmî mevsûkun-bih kimesnelerden ve Unkapanı mültezimi Yusuf Ağa’dan ve kapan kâtibi Ali Efendi’den kapan-ı dakīk vakıf mıdır ve ta‘mîr iktizâ ettikde ne tarafdan ta‘mîr olunageldiğini suâl ettikde kapan-ı mezbûr Ayasofya Vakfı’ndan olup ber-vech-i mâlikâne balık emîni olanlar taraflarından iltizâmen verilip bedel-i iltizâmını onlar kabz etmekle ta‘mîr dahi onlar tarafından olagelmişdir ve hâlâ ta‘mîre muhtâcdır ve el-yevm balık emâneti bostâniyân ocağı mâlikânesidir ve kapan iltizâmı sâlifü’z-zikr emîn tarafındandır deyü haber verdiklerini mahallinden mevlânâ-yı mezbûr ba‘de’t-tahrîr kapan-ı mezbûrun sakfında ve ba‘zı duvarlarında harâb olduğunu dahi ba‘de’l-mu‘âyene ve’l-müşâhede meclis-i şer‘a gelip haber verdiği ba‘de’t-tescîl huzûr-ı âlîlerine i‘lâm olundu. El-emru li-men-lehü’l-emr. Fî 2 min-Zilhicceti’ş-şerîfe sene 1152.