Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 400 Hüküm no: 437 Orijinal metin no: [62a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeamet iltizamıyla alakalı Hasan Ağa’dan para talep edilemeyeceği Muhzır Mustafa mübâşeretiyle Bâb Mahkemesi’ne ihzâr olunan Hasan Ağa b. İbrahim’in hasımları Mehmed b. Ömer ve diğer Mehmed b. el-Hâc Abdullah meclis-i şer‘de mezbûr Hasan Ağa’dan Bozok sancağında Emlâk nâhiyesinde Tıraz karye ve gayrıdan bâ-berât-ı âlîşân mutasarrıf olduğu ze‘âmetin bin yüz elli iki senesi ta‘şîrini üç yüz elli beş guruşa bizlere ilzâm ettikde bizler dahi iltizâm ve kabûl etmiş idik, lâkin ze‘âmet-i mezkûreyi gāib ani’l-beled es-Seyyid Mehmed Ağa bana tevcîh olunmuşdur deyü bizlere ta‘şîr ettirmemekle meblağ-ı mezbûru merkūm Hasan Ağa’dan taleb ederiz deyü eyledikleri da‘vâsını beyâna kādirler olmayıp tahlîfe dahi tâlibler olmamağla müdde‘iyân-ı mezbûrân bilâ-beyyine mu‘ârazadan men‘ olundukları huzûr-ı âlîlerine i‘lâm olundu. Fî 14 Zilhicce sene 1152.