Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 400 Hüküm no: 438 Orijinal metin no: [62a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm’ün vefat eden babasına ait Çörekçi Mehmed Beşe’de olan bazı eşyayı talep ettiğine dair açtığı davayı ispatlayamadığı Ma‘rûz Çörekci tâifesinden olup bundan akdem vefât eden Ahmed b. Abdullah’ın verâseti sulbî kebîr oğlu Abdullah ile sulbiye kebîre kızı Ümmügülsüm nâm hatuna münhasıra olduğu müte‘ayyen oldukdan sonra mezbûre Ümmügülsüm Hatun zâtı ba‘de’t-ta‘rîfi’ş-şer‘î meclis-i şer‘de derûn-ı arzuhâlde mezkûrü’l-ism Çörekci Mehmed Beşe mahzarında babam müteveffâ-yı mezbûrun terekesinden olup İstanbul’da Şehremîni sûkunda vâki‘ çörekci fırınında olan çörek âlâtından bir kebîr tas ve on tâbe ve bir bakır güğüm ve iki terâzi ve bir pîştahta ve sekiz tabla ve bir yedek revgan-ı sâde ve on keyl dakīk ve altı çeki odununu mezbûr Mehmed Beşe vaz‘-ı yed etmekle sülüs hissemi mezbûr[dan] taleb ederim deyü ba‘de’d-da‘vâ ve’l-inkâr müdde‘iye-i mezbûre ber-vech-i muharrer müdde‘âsını beyâna kādire olmayıp talebiyle mezbûr Mehmed Beşe’ye vech-i şer‘î üzere yemîn verilmeğin mûcebince müdde‘iye-i mezbûre Ümmügülsüm bilâ-beyyine mu‘ârazadan men‘ olunduğu Mahkeme-i Bâb’da tescîl ve huzûr-ı âlîlerine i‘lâm olundu. Fî 15 min-Zilhicceti’ş-şerîfe sene 1152.