Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 401 Hüküm no: 439 Orijinal metin no: [62a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müstedam Çavuş Camii karşısındaki evde oturan zimmi Nazlı’nın mahalle ahalisinin şikâyeti üzerine kendi rızasıyla evden çıkıp evin Müslüman birisine icâra verildiği Bâ-mühr-i efendi Diğer vekāi şüd Ma‘rûz Mahmiye-i İstanbul’da Sancakdâr Hayreddin mahallesi imâmı es-Seyyid Abdurrahman Efendi b. Mehmed ve ahâlîsinden Mehmed Ağa b. İbrahim ve Ali b. Hüseyin ve Hüseyin Ağa b. Derviş ve Hüseyin b. Hacı Mehmed ve es-Seyyid Ali b. el-Hâc Osman ve Osman Efendi b. Ömer ve Hâfız Molla İbrahim b. Mustafa ve Mehmed Efendi b. İbrahim nâm kimesneler meclis-i şer‘de mahalle-i mezbûrede mütemekkine Nazlı bt. Şahin nâm Nasrâniye muvâcehesinde mesfûre Nazlı’nın mahalle-i mezbûrede mülkiyet üzere mutasarrıfa olduğu menzil bundan akdem yorgancı es-Seyyid el-Hâc Ahmed nâm kimesnenin mülkü olup gerek menzil-i mezbûrda ve gerek etrâfında olan menâzile bi’l-cümle Müslimîn sâkinler iken mesfûre Nazlı sâkine olduğu menzil-i merkūmu mezbûr yorgancı es-Seyyid el-Hâc Ahmed’den iştirâ edip hâlâ kendi sâkine olmağla civârında vâki‘ Müstedam Çavuş Câmi‘-i şerîfinin kıllet-i cemâ‘atine sebeb olmuşdur deyü her biri ihbâ[r] ve teşekkî ve menzil-i mezbûrdan ihrâc olunmasını iltimâs eylediklerinde mesfûre Nazlı dahi rızâsıyla menzil-i mezbûrdan çıkıp mahalle-i mezbûre imâmı ma‘rifetiyle menzil-i merkūmu Müslim’e îcâr edip min-ba‘d kendi sâkine olmamak üzere ta‘ahhüd eylediği bi’l-iltimâs huzûr-ı âlîlerine i‘lâm olundu. Fî 16 min-Zilhicceti’ş-şerîfe sene 1152.