Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 401 Hüküm no: 440 Orijinal metin no: [62a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed’e ait olup kaybolan İvaz adlı kölenin sahibine iadesi Ma‘rûz Sâhib-i arzuhâl es-Seyyid Ahmed Bâb Mahkemesi’nde meclis-i şer‘de derûn-ı arzuhâlde mezkûr Ebubekir b. Osman b. Ebubekir’in vekîl-i şer‘îsi Ahmed muvâcehesinde işbu Nemçiyyetü’l-asl abd-ı memlûküm İvaz nâm şâbb-ı emred bundan akdem mülkümden ibâk etmemle hâlâ müvekkil-i mezbûrun yedinde olmağın bi’l-istihkāk taleb ederim deyü da‘vâ ol dahi cevâbında müvekkil-i mezbûr abd-ı merkūmu gāib ani’l-meclis diğer Ahmed nâm kimesneden iki yüz guruşa iştirâ etmiş idi deyü mülkü olduğu halde vaz‘-ı yedini ikrâr ve müdde‘î-i mezbûrun mülkü olduğunu ba‘de’l-inkâr müdde‘î-i mezbûr es-Seyyid Ahmed müdde‘âsını udûlden Ömer b. Ahmed ve Süleyman b. Mehmed şehâdetleriyle vech-i şer‘î üzere isbât ve yemîn etmeğin mûcebince abd-ı merkūmdan müvekkil-i mezbûrun kasr-ı yedine ve müdde‘î-i mezbûra teslîme hükm ve tenbîh olunduğu huzûr-ı âlîlerine i‘lâm olundu. Fî 16 min-Zilhicce sene 1152.