Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 402 Hüküm no: 441 Orijinal metin no: [62a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Külhancı Kabril’in hayatta iken Emirhan’a emanet ettiği eşyalar ile verdiği borç paranın varislerine ödenmesi Ma‘rûz Bundan akdem hâlik olan Külhancı Kabril zimmînin hasren vârisleri Ağyazar ve Haçik nâm zimmîler Bâb Mahkemesi’nde meclis-i şer‘de Muhzır Hacı Mustafa mübâşeretiyle ihzâr ettirdikleri Emirhan v. Agob nâm zimmî muvâcehesinde mûrisimiz merkūm Kabril hayâtında mesfûr Emirhan’a mecmû‘u on dört guruş kıymetli bir çakşır ve bir kırmızı çuka biniş ve bir kırmızı dolama ve bir kuzu beden kürkünü emâneten vaz‘ ve teslîm etmekle hâlâ eşyâ-i mezkûrenin aynı mevcûd ise aynını müstehlek ise ba‘de’s-sübût kıymet-i şer‘iyyelerini taleb ederiz deyü ba‘de’d-da‘vâ ve’l-inkâr müdde‘iyân-ı mezbûrân ber-vech-i muharrer müdde‘âlarını Kiragos v. Osat ve Agob v. Zarok nâm zimmîler şehâdetleriyle vech-i şer‘î üzere isbât eylediklerinde mûcebince eşyâ-i mezkûrenin aynı mevcûd ise aynını müstehlek ise ba‘de’s-sübût kıymet-i şer‘iyyelerini müdde‘iyân-ı mezbûrâna edâ ve teslîme mesfûr Emirhan zimmîye ba‘de’t-tenbîh müdde‘iyân-ı merkūmân meclis-i şer‘de mezbûr Ohan zimmî muvâcehesinde mûrisimiz hâlik-i mesfûrun merkūm Emirhan zimmetinde cihet-i karzdan on beş guruş hakkı olmağın bi’l-verâse taleb ederiz deyü da‘vâ ol dahi ikrâr lâkin hâlik-i mesfûra hâyatında tamâmen edâ ve teslîm eyledim deyü ba‘de’d-da‘vâ ve’l-inkâr dâfi‘-i mezbûr Emirhan def‘-i mezbûrunu beyâna kādir olmayıp talebiyle mezbûrân Agyazar ve Haçik zimmîlere adem-i ilme yemîn verilmeğin mûcebince meblağ-ı mezbûr on beş guruşun edâsıyla merkūm Emirhan zimmî ilzâm olunmuşdur. Fî 16 min-Zilhicce sene 1152.