Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 406 Hüküm no: 450 Orijinal metin no: [63a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Duvar üzerine pencere koyma davasında duvarın eski haliyle bırakılması ile sulh sağlandığı Keşif Bâ-mühr-i efendi Sâdır olan fermân-ı âlîlerine imtisâlen savb-ı şer‘den irsâl olunan keşif nâibimiz Hıfzı el-Hâc Mehmed Efendi ve bi’l-fi‘il Sermi‘mârân-ı hâssa el-Hâc Mehmed Ağa kulları ile mahmiye-i İstanbul’da Ahırkapı kurbünde İshak Paşa mahallesinde vâki‘ Herşah Vakfı’ndan mahall-i nizâ‘ın üzerine varıp Süleyman huzûrlarında akd eylediği meclis-i şer‘de sâhib-i arzuhâl Osman ve zevcesi Emine Hatun meclis-i ma‘kūd-ı mezkûrda vakf-ı mezbûr mütevellîsi es-Seyyid Mustafa Efendi hâzır olduğu halde yine vakf-ı mezbûrdan câr-ı mülâsıkı olup bir bâb menzile mutasarrıf olan diğer el-Hâc Osman mahzarında mezbûr Osman ile zevcesi Emine ale’l-iştirâki’s-seviyy mutasarrıf olduğumuz menzilimizin işbu mu‘âyene olunan mimâr-ı mezbûr mesâhası üzere tûlen iki buçuk ve kadden dört zirâ‘ bizlerin müstakıllen olan taş duvarımızın nısfını bi-gayr-ı hakkın zabt ve kapısı üzerinde bir aded ihdâs eylediği penceresinde bizlerin makarr-ı nisvân olan mahallerine nezâreti ve zarâr-ı şer‘îsi olmağla men‘ ü def‘ ve duvar-ı mezbûrdan keff-i yedine tenbîh olunmak matlbûmuzdur [deyü] ba‘de’d-da‘vâ mezbûr el-Hâc Osman cevâbında duvar-ı mezkûru ber-vech-i iştirâk kadîmî tasarruf edip ve el-yevm alâmet-i mevcûdesi dahi olmağla bi-hakkın tasarruf ederim dedikde tavassut-ı muslihîn ile mezbûr el-Hâc Osman’ın sokak kapısı taşrasında tarîk-i hâss-ı mezkûrda müdde‘iyân-ı mezbûrânın kendi arsası üzerinde tahta perdesi olan mahall-i mezbûr el-Hâc Osman kendi mâlıyla tûlen on iki ve kadden yedi zirâ‘ dolma duvar binâ ve iştirâken isti‘mâl ve ihdâs eylediği bir aded penceresinin zarâr-ı şer‘îsinin def‘ etmek üzere ve iddi‘â olunan taş duvarı kadîmî üzere terk ve nizâ‘dan fâriğler olup ve bu vechile kat‘-ı nizâ‘ eyledikleri mevlânâ-yı mezbûr mahallinde ketb ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihi inhâ ve takrîr eylediği huzûr-ı âlîlerine i‘lâm olundu. El-emru li-men-lehü’l-emr. Fî 18 min-Zilhicceti’ş-şerîfe sene 1152.