Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 407 Hüküm no: 451 Orijinal metin no: [63a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un vakfettiği eve tasarruf etme sırasının Rukiye’de olduğu Ma‘rûz Zâtı ta‘rîf-i şer‘î ile mu‘arrefe olan sâhibe-i arzuhâl Rukiye bt. İbrahim nâm hatun Mahkeme-i Bâb’da meclis-i şer‘de derûn-ı arzuhâlde mastûrü’l-ism Sarı Süleyman muvâcehesinde işbu yedimde olan mümzâ ve mahtûm vakfiye mantûkunca merhûme Fâtıma Hatun nâm sâhibetü’l-hayrın İstanbul’da Eğrikapı kurbünde Avcıbey mahallesinde vâki‘ bir tarafdan es-Seyyid Süleyman tasarrufunda olan vakıf menzil ve bir tarafdan kal‘a duvarı ve bir tarafdan hendek ve bir tarafdan tarîk-i âm ile mahdûd tûlen ve arzen bi-hesâb-ı terbî‘î yüz elli dokuz zirâ‘ arsa ve üzerinde mevcûd ebniye-i atîkasının süknâsını vâkıfe-i merkūme evvelâ nefsine ba‘de vefâtihâ evlâdına ve ba‘dehû atîk ve atîkātına ve evlâdlarına şart [ve] vakfetmekle bundan akdem menzil-i mahdûd-ı mezkûra ber-vech-i meşrûta mutasarrıf olan evlâd-ı utekādan Ebubekir b. Mustafa nevbet-i tasarrufunu mezbûr Sarı Süleyman’a yirmi guruş mu‘accele ve senevî otuz akçe icâre-i müeccele ile îcâr etmiş idi, hâlâ mezbûr Ebubekir fevt olup ve ben dahi evlâd-ı utekādan bulunmağla menzil-i mahdûd-ı mezkûrun nevbet-i tasarrufu benim olmağla taleb ederim deyü ba‘de’d-da‘vâ mezbûr Süleyman dahi mezbûre Rukiye vâkıfe-i mezbûrenin evlâd-ı atîkātdan olup ve menzil-i mahdûd-ı mezkûrun süknâsı meşrûta olmağla nevbet-i tasarruf mezbûre Rukiye’nin olduğunu bi-tav‘ihî ikrâr ve i‘tirâf eylediği sâdır olan fermân-ı âlîlerine imtisâlen huzûr-ı âlîlerine i‘lâm olundu. El-emru li-men-lehü’l-emr. Fî 20 min-Ramazan sene 1152.