Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 407 Hüküm no: 452 Orijinal metin no: [63a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan ile onu bıçaklayan Ahmed arasındaki davaya sulh bedeli karşılığı son verildiği Ma‘rûz Mumcu Musa Beşe mübâşeretiyle Mahkeme-i Bâb’a ihzâr olunan Ahmed b. Mehmed ve Hasan b. Hacı Hüseyin’in hasmı es-Seyyid Hasan b. Mehmed b. Oruc tarafından zikri âtî sulhü ikrâra vekîl olduğu İmâm Ali Efendi b. Veli ve Abdullah b. Hacı Ahmed şehâdetleriyle şer‘an sâbit olan li-ebeveyn er karındaşı es-Seyyid Bilal meclis-i şer‘de mezbûrân Ahmed ve Hasan bundan akdem müvekkilim mezbûr es-Seyyid Hasan’ın sol kolunun dirseğinden ve sol memesi altına beyâz kabzalı bıçak ile bi-gayr-ı hakkın amden darb ve cerh etmekle mûcib-i şer‘îsini taleb ve da‘vâ ettikde onlar dahi bi’l-külliye münkir olmağın beynlerinde nizâ‘-ı küllî cereyân etmiş idi, el-hâletü hâzihi muslihûn tavassutuyla müvekkilim mezbûr es-Seyyid Hasan da‘vâ-yı mezkûresinden mezbûrân Ahmed ve Hasan ile an-inkâr otuz beş guruş bedel-i makbûza sulh olup cerh-i mezkûra ve mâ yahdüsü anhe müte‘allıka âmme-i da‘vâdan mezbûrânı ibrâ eyledikde onlar dahi ba‘de’l-kabûl bedel-i sulh olan meblağ-ı mezbûr otuz guruşa müte‘allıka âmme-i da‘vâdan müvekkilim mezbûru ibrâ eylediler deyü ikrârı ba‘de’t-tesâduk tescîl olunmuşdur. Fî 21 min-Zilhicce sene 1152.