Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 408 Hüküm no: 453 Orijinal metin no: [63a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Neslihan’ın vefat eden kocası Mehmed’in bezzazistanda bir dolaba koyduğu paraları Afife Hatun’un aldığına dair iddiasını ispatlayamadığı Bâ-mühr-i efendi Ma‘rûz Sâhibe-i arzuhâl Hacce Neslihan nâm hatun derûn-ı arzuhâlde mastûrü’l-ism Afife nâm hatunun müteveffâ zevci Mehmed nâm kimesnenin hayâtında sandal bezzâzistânında vâki‘ dolaba vaz‘ eylediği arzuhâl-i mezkûr nâtık olduğu bin üç yüz kırk beş guruşu ba‘de’l-vefât zikr olunan dolabdan mezbûre Afife bi’z-zât ihrâc ve bi-gayr-ı hakkın ahz eyledi deyü da‘vâya tasaddî etmekle sâdır olan fermân-ı âlîlerine imtisâlen kıbel-i şer‘den irsâl olunan vekāyi‘ kâtibimiz es-Seyyid Ahmed Efendi bezzâzistân-ı mezbûra varıp kethüdâsı Ali Ağa b. Ahmed ve bölükbaşıları el-Hâc Osman ve el-Hâc Ahmed ve sâir mazbûtü’l-esâmî hademesinden husûs-ı mezbûr tefahhus olundukda müteveffâ-yı mezbûr ile’l-vefât zikr olunan dolaba kat‘an kimesneyi müdâhale ettirmeyip vefât eylediğinde ma‘rifet-i şer‘le feth ve yine mühürlenip müteveffâ-yı mezbûr Mehmed’in gerek hayâtında ve gerek ba‘de vefâtihî ilâ-hâze’l-ân mezbûre Afife zikr olunan dolaba aslâ müdâhale etmediğinden mâ‘adâ kat‘an bezzâzistân-ı mezbûra dahi gelmedi deyü her biri mezbûre Neslihan’ın vekîli Hadîce bt. Mustafa nâm hatun muvâcehesinde haber verdiklerinde mezbûre Hadîce dahi muhbirûn-ı mezbûrûnu kelimât-ı meşrûhalarında tasdîk ve tahkīk eylediğini kâtib-i merkūm mahallinde tahrîr ba‘dehû ma‘an ba‘s olunan ümenâ-i şer‘le meclis-i şer‘a gelip alâ-vukū‘ihi inhâ ve takrîr eylediği huzûr-ı âlîlerine i‘lâm olundu. Bâkī fermân men-lehü’l-emr hazretlerinindir. Hurrire fî 21 min-Zilhicceti’ş-şerîfe sene 1152.