Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 410 Hüküm no: 457 Orijinal metin no: [63b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer’in vefat eden Ahmed Efendi’de alacağı olduğuna dair iddiası Bâ-mühr-i efendi Ma‘rûz Sâhib-i arzuhâl Ömer meclis-i şer‘de derûn-ı arzuhâlde mastûr müteveffâ Nüzûl Kâtibi Ahmed Efendi b. Mustafa b. Ali’nin hasren vârisleri li-ebeveyn er karındaşı Abdullah ve zâtı ta‘rîf-i şer‘î ile mu‘arrefe olan kız karındaşı Ümmügülsüm muvâcehelerinde müteveffâ-yı mezbûra hayâtında bin yüz elli senesi Saferi’l-hayrının yirminci günü İsakcı nâm mahalde kendi çadırında mâlımdan kırk aded Mısır zincirlisi altın ve kırk cedîd guruşu ikrâz ve teslîm eylediğimde ol dahi istikrâz ve tesellüm ve bana kable’l-edâ vefât etmiş idi, el-hâletü hâzihi mezbûrân Abdullah ve Ümmügülsüm’ün vâzı‘ayi’l-yed oldukları tereke-i vâfiyesinden taleb ederim deyü da‘vâ onlar dahi tereke-i mezbûreye vaz‘-ı yedlerini ikrâr lâkin deyn-i mezbûru ba‘de’l-inkâr müdde‘î-i mezbûr ber-vech-i muharrer müdde‘âsına bir şâhid ikāmet edip şâhid-i âhara havâle olunup bundan akdem zabt olunduğu fermân-ı cihân-mutâ‘larına imtisâlen huzûr-ı âlîlerine i‘lâm olundu. Fî 22 min-Zilhicceti’ş-şerîfe sene 1152.