Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 413 Hüküm no: 464 Orijinal metin no: [64a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’dan boşanan Mehmed’in hanımının haklarını vermesi Bâ-mühr-i efendi Ma‘rûz Sâhibet-i arzuhâl Fâtıma Hatun zâtı ba‘de’t-ta‘rîfi’ş-şer‘î meclis-i şer‘de derûn-ı arzuhâlde mezkûrü’l-ism zevc-i sâbıkı Mehmed muvâcehesinde mezbûr Mehmed zevcim olup bundan akdem beni bâyinen tatlîk etmekle zimmetinde mütekarrer ve ma‘kūdün-aleyh olan iki bin akçe mehr-i müeccelim ile nafaka-i iddet ve me’ûnet-i süknâm için bi’t-terâzi ta‘yîn olunan üç yüz akçe ki cem‘an iki bin üç yüz akçe hakkımı mezbûr Mehmed’den taleb ederim deyü da‘vâ eyledikde mezbûr Mehmed cevâbında müdde‘iye-i mezbûre Fâtıma Hatun ancak bin iki yüz akçe mehr-i müeccel tesmiyesiyle zevcem olup bâyinen tatlîk eylediğini ikrâr mâ‘adâ sekiz yüz akçe mehrini inkâr etmeğin mûcebince ikrârı mertebesi olan meblağ-ı mezbûr bin iki yüz akçe ile nafaka-i iddet ve me’ûnet-i süknâsı’çün bi’t-terâzi ta‘yîn olunan üç yüz akçe ki cem‘an bin beş yüz akçeyi müdde‘iye-i mezbûre Fâtıma Hatun’a edâ ve teslîme mezbûr Mehmed’e ba‘de’t-tenbîh ziyâde müdde‘âsı’çün mezbûre Fâtıma beyâna havâle olunduğu Mahkeme-i Bâb’da tescîl ve huzûr-ı âlîlerine i‘lâm olundu. Fî 24 min-Zilhicce sene 1152.