Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 415 Hüküm no: 470 Orijinal metin no: [64a-8] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa’nın hizmetkârı Ahmed’in kilitli çekmeceden aldığı paraları iade etmesi Ma‘rûz Çukadâr el-Hâc Ömer mübâşeretiyle Bâb Mahkemesi’ne ihzâr olunan Ahmed’den el-Hâc Ali Ağa meclis-i şer‘de mezbûr Ahmed hizmetkârım olmağla târîh-i i‘lâmdan üç ay mukaddem Ali Paşa-i atîk mahallesinde sâkin olduğum mülk menzilin mâ-beyn odasında olan mukaffel pîştahtamı feth ve içinden bi’d-defa‘ât elli yedi guruşumu hufyeten ahz eylediğinden sonra meblağ-ı mezbûrun on beş buçuk guruşunu bana ba‘de’t-teslîm meblağ-ı bâkī kırk bir buçuk guruşumu mezbûr Ahmed’den taleb ederim deyü da‘vâ ettikde ol dahi cevâbında müdde‘î-i mezbûrun pîştahtasından ancak otuz dört guruşunu hufyeten ahz eylediğini ba‘de’l-i‘tirâf meblağ-ı mezbûrun dahi on beş buçuk guruşunu kendüye teslîm edip zimmetinde on sekiz buçuk guruş deyni olduğunu ikrâr etmeğin ikrâr-ı mezbûru olan meblağ-ı mezbûr on sekiz buçuk guruşu müdde‘î-i merkūma edâya mezbûr Ahmed’e tenbîh olundukdan sonra müdde‘î-i merkūm ziyâde müdde‘âsı’çün beyâna havâle olunmuşdur. El-emru li-men-lehü’l-emr. Fî 26 Z sene 1152.