Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 418 Hüküm no: 476 Orijinal metin no: [64b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyh Yavsî Vakfı’na ait evi elinde bulunduran İsmail’in evi hak sahibi olan Ayşe Hatun’a bırakması Bâ-mühr-i efendi Ma‘rûz Sâhibe-i arzuhâl Âişe Hatun derûn-ı arzuhâlde mezkûrü’l-ism İsmail b. Ahmed mahzarında mezbûr İsmail Sultan Selim kurbünde Çukur Bostan’da vâki‘ merhûm Şeyh Yavsî Vakfı’na senede on üç akçe mukāta‘ası olan ma‘lûmü’l-hudûd tûlen on bir zirâ‘ ve arzen sekiz bi-hesâb-ı terbî‘î seksen sekiz zirâ‘ arsa üzerinde kâin ebniye-i memlûke-i ma‘lûmeyi merhûme Saliha Hatun nâm sâhibetü’l-hayr yedinde mülkü iken vakfedip süknâsı hayâtda oldukça kendi ba‘de vefâtihâ zevci Şahin b. Hüseyin’in mu‘takası Hamide’ye ba‘de vefâtihâ mezbûre Hamide’nin evlâd-ı evlâd-ı evlâdı sâkin olalar deyü bin doksan altı senesi târîhiyle müverraha işbu meclis-i şer‘de feth ü kırâet olunan vakfiye-i ma‘mûlün-bihâda tastîr olunan vech üzere şart ve ta‘yîn edip hâlâ mezbûre Hamide’nin evlâdından ve nevbet-i tasarruf dahi benim iken mezbûr İsmail yedinde olan iki kıt‘a mübâya‘a hüccetleri mantûklarınca menzil-i mezbûrun bi’l-cümle arsa ve binâsı şirâen mülkdür deyü bi-gayr-ı hakkın zabt ve tasarruf etmekle menzil-i mezbûrdan kasr-ı yed ve bana teslîme mezbûr İsmail’e tenbîh olunmak matlûbumdur deyü da‘vâ, mezbûr İsmail dahi menzil-i mezbûrun ber-vech-i muharrer vakfiyeti ve mazmûn-ı vakfiye-i mezbûreyi ve müdde‘iye-i mezbûrenin vech-i meşrûh üzere evlâddan olup nevbet-i tasarruf dahi mezbûre Âişe’nin olduğunu ikrâr ve i‘tirâf ve menzil-i mezbûrdan kasr-ı yed ve müdde‘iye-i mezbûreye teslîm eyledikde mezbûre Âişe dahi kendi mâlından rızâsıyla teberru‘an merkūm İsmail’e elli iki guruş def‘ ve teslîm edip kat‘-ı nizâ‘ları huzûr-ı âlîlerine i‘lâm olundu. Fî 21 min-Zilhicce sene 1152.