Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 419 Hüküm no: 477 Orijinal metin no: [65a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi’nin hanımından aldığı borcu ödemesi Sâhibe-i arzuhâl Hacce Rukiye nâm hatun zâtı ba‘de’t-ta‘rîfi’ş-şer‘î meclis-i şer‘de zevci olup derûn-ı arzuhâlde mastûrü’l-ism kuzâtdan Mustafa Efendi muvâcehesinde bundan akdem mâlımdan bir def‘a bâ-temessük bin guruş ve hâric ez-temessük bir def‘a iki yüz guruş ve bir def‘a Mısır zincirlisi ve zer-i mahbûb mahlût elli aded altın ve bir def‘a kezâlik mahlût yirmi aded altınımı mezbûr Mustafa Efendi’ye ikrâz ve teslîm eylediğimde ol dahi yedimden istikrâz ve kabz ve kabûl etmiş idim, hâlâ mecmû‘unu taleb ederim deyü da‘vâ, mezbûr Mustafa Efendi dahi zikr olunan bin guruşun yedi yüz guruşunu ve iki yüz guruşun elli beş guruşunu ikrâr ziyâdeyi bi’l-külliye ba‘de’l-inkâr müdde‘iye-i mezbûrenin ber-vech-i muharrer ziyâde müdde‘âsı beyâna havâle olunup ikrârı mertebesi olan yedi yüz elli beş guruşun edâsına mezbûr Mustafa Efendi’ye tenbîh olunduğu huzûr-ı âlîlerine i‘lâm olundu. Fî 29 min-Zilhicce sene 1152.