Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 72 Hüküm no: 67 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Göç amacıyla İstanbul’a geliş gidişlerin kontrol altında tutulması hakkındaki emre uyulması Akzâ kuzâti’l-Müslimîn evlâ vülâti’l-muvahhidîn me‘âdinü’l-fazl ve’l-yakīn râfi‘ü a‘lâmi’ş-şerî‘ati ve’d-dîn, vârisü ulûmi’l-evliyâi ve’l-mürselîn el-muhtassu bi-mezîdi inayeti’l-meliki’l-mu‘în mevlânâ Üsküdar kādısı -zîde fezâiluhû- ve mefâhirü’l-kuzât ve’l-hükkâm me‘âdinü’l-fezâil ve’l-kelâm Gekbûze ve Karamürsel ve Yalakâbâd ve Pazarköy ve Gemlik ve Mudanya ve Taşköprü ve sâir ol havâlîlerde kuzât ve nüvvâb -zîde fazluhum- ve mefâhirü’l-emâsil ve’l-akrân serdârlar ve mukāta‘ât ve evkāf zâbitleri ve sâir zâbitân ve iskele emînleri ve a‘yân-ı vilâyet -zîde kadruhüm- tevkī‘-i refî‘-i hümâyûn vâsıl olıcak ma‘lûm ola ki taşradan Âsitâne-i aliyyeme ev göçü gelmemek ve sahîh erbâb-ı mesâlihden olanlar ile erbâb-ı ticâretden olanlardan mâ‘adâsının bu tarafa mürûr u ubûruna bir tarîkle ruhsat ve cevâz gösterilmemek içün evâmir-i aliyyemde bi’d-defa‘ât tenbîh-i ekîdden hâli olunmadığına binâen evâmir-i şerîfemin ale’d-devâm infâz ve icrâsına sarf ve makderet eylemeniz lâzım ve lâ-büd iken adem-i ihtimâmınızdan nâşî murâd eden eşhâs hâlâ gelmemek [gelmek] üzere olup bu bâbda sünûh eden tesâmuhunuzdan iğmâz olunmak bir türlü maksûd olmamağla fîmâ-ba‘d ber-vech-i muharrer ev göçlerinin ve bilâ-maslahat Âsitâne-i sa‘âdetime gelmek murâd edenlerin bi’d-defa‘ât sâdır olan evâmir-i şerîfem mantûklarınca kâ’inen-men-kân mürûrlarına ruhsat gösterilmeyüp alâ-eyyi hâl izleri üzere vilâyetlerine i‘âde ve ircâ‘larına bi’l-ittifâk sa‘y ü dikkat eylemeniz içün te’kîden ve ihtimâmen bu def‘a dahi işbu emr-i şerîfim ısdâr ile irsâl olunmuşdur imdi vusûlünde hükûmetinizde olan memerr ü ma‘berleri üslûb-ı sâbık üzere bir hoşca zabt ve hıfz ve dikkat ve erbâb-ı mesâlihden olduğu müte‘ayyin oldukdan sonra bir veyâ iki neferden ziyâdesinin mürûrlarına berren ve bahren ve bilâ-maslaha kimesneleri sefînelere almamak üzere iskelelere ve amed-şüd eden sefîne reislerine ve zâbitlerine muhkem tenbîh ve te’kîd olunarak bu tarafa salıverilmemek ve ihbâr veyâhud bu tarafda ahz olunmak lâzım gelir ise her kim olursa olsun bilâ-emân eşedd-i cezâ ile mücâzât olunacağını muhakkak bilüp ona göre basîret üzere hareket ve bu bahâne ile akçe almakdan gāyetü’l-gāye hazer ve mücânebet olunmak bâbında fermân-ı âlîşânım sâdır olmuşdur buyurdum ki vusûl buldukda vech-i meşrûh üzere şeref-yâfte-i sudûr olan fermân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnu ile âmil, hilâfından gāyetü’l-gāye ihtirâz eyleyesiz alâmet-i şerîfe i‘timâd kılasız. Tahrîren evâhir-i şehri Şa‘bâni’l-mu‘azzam sene tis‘a ve seb‘în ve mi’ete ve elf. Be-makām-ı İslambol el-Mahrûse.