Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 336 Hüküm no: 488 Orijinal metin no: [73a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İlya v. Yorgi’nin alacağından kalan kısmını da tamamen tahsil ettiği Mahrûse-i Üsküdar’da sâkin olup müsellem olan İlya v. Yo[r]gi nâm zimmî mahfil-i kazâda sabıkā bostancıbaşı olan Ahmed Ağa’nın hazînedârı işbu bâ‘isü’l-kitâb Ahmed Bey b. Mehmed mahzarında ikrâr ve takrîr-i kelâm edip târîh-i kitâbdan bir sene mukaddem mezkûr Ahmed Ağa bostancıbaşı iken ihrâc ediverdiği iki müsellem berâtlarını mezkûr Ahmed Ağa’dan tahlîs için mezbûr Ahmed Bey’e iki yüz seksen riyâlî guruş def‘ ve teslîm ol dahi kabz ve tesellüm eylemiş idi. Meblağ-ı mezbûr iki yüz seksen riyâlî guruşu yine târîh-i kitâb şehrinin üçüncü günü Mahmud Paşa Mahkemesi Nâibi Abdullah Efendi huzûrunda da‘vâ ve taleb eylediğimde mezbûr Ahmed bin yüz seksen guruş kabz eylediğini ikrâr ve yüz guruşunu inkâr etmekle istihlâf eylediğimde mezbûr Ahmed Bey yemînden nükûl etmeğin zikrolunan iki yüz seksen guruşu bana edâ etmek üzere hükmolunup yedime hüccet-i şer‘iyye vermiş idi. El-hâletü hâzihî zikrolunan iki yüz seksen riyâlî guruşu yedimde olan hüccet-i şer‘iyye mûcebince mezbûr Ahmed Bey’den bi’t-tamam ve’l-kemâl ahz u kabz eyledim, meblağ-ı mezbûrdan bir akçe ve bir habbe bâkī kalmadı dedikde mukırr-ı mezbûr İlya’nın ber-vech-i meşrûh cârî ve sâdır olan ikrâr ve takrîrini el-mukarru lehü’l-merkūm Ahmed Bey vicâhen tasdîk ve şifâhen tahkīk etmeğin mâ-vaka‘a bi’t-taleb ketb olundu. Fi’l-yevmi’t-tâsi‘ min-Zilka‘deti’ş-şerîfe li-sene erba‘a ve sittin ve elf. Şuhûdü’l-hâl: İbrahim Bey b. Durak, Mehmed Bey ser-bölük, Osman Çavuş el-mübâşir, İbrahim Çelebi [b.] Davud, Kadri Efendi el-kâtib ve gayruhum.