Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 337 Hüküm no: 489 Orijinal metin no: [73a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe’nin kereste bahasından alacağı olduğu İşbu bâ‘isü’l-kitâb Ahmed Beşe b. Mehmed nâm kimesne meclis-i şer‘-i hatîr-i lâzımü’t-tevkīrde Osman Bey b. Abdullah muvâcehesinde üzerine da‘vâ ve takrîr-i kelâm edip mezbûr Osman Bey zimmetinde yedimden müşterâ ve makbûz mikdârı beynimizde ilm-i şer‘î ile ma‘lûm kereste bahâsından dokuz bin iki yüz doksan beş akçe hakkım vardır suâl olunup alıverilmesi matlûbumdur dedikde gıbbe’s-suâl mezbûr Osman cevâbında fi’l-vâki‘ müdde‘î-i mezbûr Ahmed Beşe’ye mikdârı beynimizde ma‘lûm kereste bahâsından zimmetimde lâzımü’l-edâ ve vâcibü’l-kazâ dokuz bin iki yüz <> doksan beş akçe deynim vardır deyü ikrâr u i‘tirâf etmeğin ikrârı mûcebince meblağ-ı merkūmu müdde‘î-i mersûma def‘ ve teslîm etmek üzere mezbûr Osman Bey’e tenbîh olunup mâ-hüve’l-vâki‘ bi’t-taleb ketb ü sebt olundu. Fi’l-yevmi’s-sâmin min-Zilka‘deti’ş-şerîfe li-sene erba‘a ve sittin ve elf. Şuhûdü’l-hâl: İbrahim Çelebi b. Davud, Pîrî Beşe b. Hüseyin, Mehmed Çelebi b. Hüseyin, Mehmed b. Ahmed ve gayruhum mine’l-huzzâr.