Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 430 Hüküm no: 504 Orijinal metin no: [66b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çeşitli kişilere borcu olan Huri’nin borcunun tecili Bâ-mühr-i efendi Ma‘rûz Sâhibe-i arzuhâl Huri nâm Nasrâniyenin zimmetinde semen-i mebî‘den dört yüz altmış guruş hakkı olan Keresteci Kirkor ve cihet-i karzdan yüz guruş hakkı olan Ohan ve yüz guruş hakkı olan Kirkor ve otuz bir guruş on para hakkı olan Kiragos nâm zimmîler ve yirmi yedi guruş hakkı olan Tobi ve kırk guruş hakkı olan Zümrüd nâm Nasrâniyeler meclis-i şer‘de mesfûre Huri’nin duyû[n]-ı mezkûresini def‘aten edâya iktidârı olmayıp mu‘dime ve mu‘sire olduğunu i‘tirâf ve rızâlarıyla zikr olunan meblağları işbu târîh-i i‘lâmdan her otuz gün tamâmında her bir guruş başına birer akçe almak üzere müddet-i ma‘lûme tamâmına dek mezbûre Huri’yi vech-i şer‘î üzere tecîl ve temhîl eylediklerinde ol dahi i‘tirâf ve ber-vech-i muharrer edâya ba‘de’t-ta‘ahhüd sâir dâyinleri olup yetmiş beş guruş hakkı olan Saltana nâm Nasrâniye ve yüz otuz guruş hakkı olan Sıvacı Yoseb ve yüz yirmi guruş hakkı olan Gorci nâm zimmîler meclis-i şer‘a gelmeyip bi’d-defa‘ât ihbâr olundukda mezbûrlar tecîle dahi tâlibler olmadıkları huzûr-ı âlîlerine i‘lâm olundu. Fî 7 min-Muharremi’l-harâm sene 1153.