Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 433 Hüküm no: 511 Orijinal metin no: [67a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mardıros’un Nurses v. Mikail’e borcunu ödediği Ma‘rûz Sâhib-i arzuhâl Avanes zimmînin karındaşı Sahak zimmî Mahkeme-i Bâb’da meclis-i şer‘de derûn-ı arzuhâlde mezkûrü’l-ism Mardıros zimmî muvâcehesinde mesfûr Mardıros gāib ani’l-meclis Nurses v. Mikail zimmîye cihet-i karzdan zimmetinde edâsı lâzım yüz yirmi guruş deynim olmağla gāib-i mesfûrun tarafından vekîl olmak üzere yüz yirmi guruşu benden iddi‘â ve meblağ-ı mezbûru yedimden ahz u kabz etmekle meblağ-ı mezbûru mesfûr Mardıros’dan taleb ederim deyü ba‘de’d-da‘vâ mesfûr Mardıros cevâbında bundan akdem Ahî Çelebi Mahkemesi’nde hilâfeten müvellâ olan es-Seyyid Mehmed Efendi huzûrunda gāib-i mesfûr Nurses v. Mikail tarafından vekîl olduğunu merkūm Sahak muvâcehesinde isbât ve meblağ-ı mezbûr yüz yirmi guruşu hükm-i hâkim ile vekâleten yedinden ahz u kabz eyledim deyü def‘ etmeğin gıbbe’l-istintâk mesfûr Sahak ber-vech-i muharrer def‘-i mezbûru mukırr u mu‘terif olmağın mûcebince müdde‘î-i merkūm Sahak bî-vech mu‘ârazadan men‘ olunduğu tescîl ve huzûr-ı âlîlerine i‘lâm olundu. Fî 3 min-Muharremi’l-harâm sene 1153. Ceffe’l-kalem fî-hâze’l-makām (mühür) Fazîletli semâhetli Kırımî Mehmed Efendi hazretlerinin def‘a-i sâniyelerinde vâki‘ olan i‘lâmlar tescîlidir fi’l-yevmi’l-âşir min-Muharremi’l-harâm li-sene selâse ve hamsîn ve mi’e ve elf