Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 435 Hüküm no: 514 Orijinal metin no: [67a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. İbrahim’in davası sebebiyle Mudanya naibinden para talebinin yersiz olduğu Ma‘rûz Mumcu İbrahim Beşe mübâşeretiyle Bâb Mahkemesi’ne ihzâr olunan Mehmed Emin Efendi’nin hasmı Mehmed b. İbrahim meclis-i şer‘de merkūm Mehmed Emin Efendi mahzarında merkūm Mehmed Emin Efendi târîh-i i‘lâmdan on sekiz gün mukaddem Mudanya kasabasında nâibü’ş-şer‘ iken beni habs ve bi-gayr-ı hakkın kırk beş guruşumu ahz etmekle meblağ-ı mezbûru merkūm Mehmed Emin Efendi’den taleb ederim deyü da‘vâ eyledikde ol dahi cevâbında hâl-i niyâbetimde huzûr-ı şer‘de kasaba-i mezbûre ahâlîsinden gāib ani’l-beled Ahmed b. Mustafa nâm kimesne mezbûr Mehmed kırk beş guruş kıymetli altından masnû‘ bir incili kuşağımı sirkat eyledi deyü ba‘de’d-da‘vâ ve’l-inkâr müdde‘î-i mezbûr Ahmed ber-vech-i muharrer müdde‘âsını vech-i şer‘î üzere isbât edip hükm-i şer‘î lâhık oldukdan sonra zikr olunan kuşağın kıymeti olan kırk beş guruşu mezbûr Mehmed’den tahsîl ve merkūm Ahmed’e teslîm eyledim deyüp ol vechile kabzını ikrâr etmeğin mezbûr Mehmed Emin Efendi husûs-ı mezbûrda takrîr-i meşrûhu üzere kavliyle tasdîk olunmağın merkūm Mehmed bî-vech mu‘ârazadan men‘ olunduğu huzûr-ı âlîlerine i‘lâm olundu. Bâkī emr ü fermân men-lehü’l-emrindir. Fî 12 min-Muharrem sene 1153.