Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 435 Hüküm no: 515 Orijinal metin no: [67b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ulaşı v. Senakeri’nin borcu sebebiyle Mudanya naibine verdiği paradan hak iddia edemeyeceği Mumcu İbrahim Beşe mübâşeretiyle Bâb Mahkemesi’ne ihzâr olunan Mehmed Emin Efendi’nin hasmı Ulaşı v. Senakeri zimmî meclis-i şer‘de mezbûr Mehmed Emin Efendi mahzarında mezbûr Mehmed Emin Efendi târîh-i i‘lâmdan yirmi bir gün mukaddem Mudanya kasabasında nâibü’ş-şer‘ iken beni habs ve bi-gayr-ı hakkın altmış guruşumu ahz u kabz etmekle meblağ-ı mezbûru Mehmed Emin Efendi’den taleb ederim deyü da‘vâ ettikde ol dahi cevâbında niyâbetim hâlinde huzûr-ı şer‘de kasaba-i mezbûre ahâlîsinden gāib ani’l-beled el-Hâc Osman b. Hüseyin nâm kimesne mesfûr Ulaşı zimmetinde cihet-i deyn-i şer‘îden altmış guruş hakkım vardır deyü ba‘de’d-da‘vâ ve’l-inkâr müdde‘î-i mezbûr el-Hâc Osman müdde‘âsını vech-i şer‘î üzere isbât edip hükm-i şer‘î lâhık oldukdan sonra meblağ-ı mezbûr altmış guruşu mesfûrdan tahsîl ve mezbûr el-Hâc Osman’a def‘ ü teslîm eyledim deyü ol vechile kabzını ikrâr etmeğin mezbûr Mehmed Emin Efendi takrîr-i meşrûhu üzere husûs-ı mezbûrda kavliyle şer‘an tasdîk olunmağın mesfûr Ulaşı zimmî bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 12 min-Muharrem sene 1153.