Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 436 Hüküm no: 516 Orijinal metin no: [67b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hac İlyas Vakfı’na ait evin yanındaki eve mutasarrıf olan Ali’nin yaptığı tuvaleti yıkıp vakıf eve zarar vermeyecek şekilde yapması Ma‘rûz Ma‘rûz-ı dâ‘î-i devletleridir ki, sâdır olan fermân-ı âlîlerine imtisâlen kıbel-i şer‘den irsâl olunan keşif nâibi Hıfzı el-Hâc Mehmed Efendi dâ‘îleri hâssa mimârı hulefâsından Yusuf ve Süleyman halîfeler ile mahmiye-i İstanbul’da Müftî Hamamı kurbünde Kâtib Hüsrev mahallesinde vâki‘ merhûm el-Hâc İlyas nâm sâhibü’l-hayrın süknâ ve tevliyeti ulemâya şart eylediği menzile varıp huzûr-ı Müslimînde akd eylediği meclis-i şer‘de menzil-i mezkûrun ber-mûceb-i şart-ı vâkıf tevcîh-i hâkimü’ş-şer‘ ile mutasarrıfı ve mütevellîsi sâhib-i arzuhâl fahrü’l-müderrisîni’l-kirâm İsmail Efendi derûn-ı arzuhâlde mezkûr Muhaşşî Sinan Efendi Evkāfı’ndan bir bâb menzile mutasarrıf olan câr-ı mülâsıkı Ali muvâcehesinde vakıf mütevellîsi vekîli hâzır olduğu halde mezbûr Ali benim ber-vech-i muharrer mutasarrıf olduğum menzilin işbu mu‘âyene olunan mimârân-ı mezbûrân mesâhaları üzere tûlen altı zirâ‘ ve arzen bir başı bir zirâ‘ altı parmak ve kenîfi tarafı ancak bir parmak müstakıllen vakf-ı mezbûr damlalığı üzerine mezbûr Ali tûlen üç buçuk zirâ‘ ve arzen Âişe Hatun tarafı ancak altı parmak ve sofası tarafı bir parmak yerde? bi-gayr-ı hakkın binâsına şurû‘ eylediği kenîfinin sütunlarını ve üzerine tahta-bend tahtalarını vaz‘ edip kat‘ını da‘vâ eyledikde mezbûr Ali ber-vech-i meşrûh zikr olunan damlalık arsası müstakıllen mûmâ-ileyh İsmail Efendi’nin mutasarrıf olduğu menzil arsasından olduğunu ba‘de’l-ikrâr ihdâs eylediği tûlen üç buçuk zirâ‘ ve Âişe Hatun tarafından altı parmak ve sofası tarafı bir parmak kenîfinin sütununu geriye çekip ve üzerinde olan tahta-bend tahtalarını mahall-i merkūmda kat‘ edip bu vechile nizâ‘larının inkıtâ‘ını mevlânâ-yı mezbûr mahallinde ketb ve ümenâ-i şer‘le meclis-i şer‘a gelip alâ-vukū‘ihi inhâ eylediği huzûr-ı âlîlerine i‘lâm olundu. Bâkī emr hazret-i veliyyü’l-emrindir. Fî 11 M sene 1153.